161 работник загинале за пет години: Несреќите при работа остануваат сериозен системски проблем

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

161 работник загинале за пет години: Несреќите при работа остануваат сериозен системски проблем

23 јануари 2026

• од Станча Јаќимовски

Во периодот од 2021 до 2025 година во Македонија се регистрирани 1.180 несреќи при работа, при што 161 работник го загубил животот, покажуваат податоци до кои дојде порталот Инфомакс преку официјални институционални извори. Годишно се случуваат над 200 несреќи, а десетици случаи завршуваат со тешки телесни повреди, што укажува на длабок и долгорочен проблем во областа на безбедноста и здравјето при работа.

„За туѓи бели дворови, копај си црни гробови“, стихот од песната „Денови“ од збирката Бели мугри на Кочо Рацин, и денес ја отсликува реалноста на дел од македонските работници кои секојдневно работат во небезбедни услови.

Годишна статистика со високи бројки

Според официјалните податоци од Министерството за внатрешни работи, во 2021 година биле регистрирани 213 несреќи при работа, од кои 12 завршиле со смртен исход. Во 2022 година бројот пораснал на 232 случаи, при што 18 работници го загубиле животот – најмногу во анализираниот период.

Во 2023 година се евидентирани 264 несреќи, што е најголем број во последните пет години, со девет смртни случаи и 76 тешки телесни повреди. Во 2024 година имало 229 несреќи, од кои 10 со смртен исход, додека во 2025 година се регистрирани 242 случаи, со 12 починати работници.

Дел од повредите никогаш не се пријавуваат

Според Сојузот на синдикати на Македонија, кој ги следи овие податоци, вистинската бројка на повреди е веројатно и повисока. Синдикатите укажуваат дека значителен дел од повредите при работа не се пријавуваат, а во одредени случаи работодавачите вршат притисок врз работниците да не пријават дека повредата се случила на работното место.

На овој начин, работниците не само што остануваат без соодветна правна заштита, туку и финансиски се оштетени, бидејќи боледувањето за повреда при работа се исплаќа целосно, за разлика од обично боледување. Воедно, пријавени професионални заболувања речиси и да нема, главно поради сложената процедура за нивно докажување.

Безбедноста како трошок, а не како инвестиција

Од ССМ оценуваат дека кај дел од работодавачите сè уште преовладува ставот дека безбедноста и здравјето при работа се трошок, а не долгорочна инвестиција во човечкиот капитал и работната опрема. Според нив, законот недоследно се применува, инспекцискиот надзор е слаб, а казните за сериозни прекршоци ретки.

Најголем број жртви се бележат во градежниот сектор, по што следуваат земјоделството и други дејности со зголемен ризик.

Законска рамка и институционални најави

Законот за безбедност и здравје при работа ги обврзува работодавачите да обезбедат безбедни услови за работа, соодветна заштитна опрема и редовни обуки за вработените, особено при промени на работниот процес или воведување нови технологии.

Од Министерството за економија и труд, во одговор на новинарски прашања доставени од Инфомакс, информираат дека е планирано започнување постапка за изработка на нов Закон за безбедност и здравје при работа, како и измени на Законот за инспекција на труд, со цел поефикасен надзор и усогласување со важечката регулатива.

Одговорност ретко се утврдува

И покрај законските обврски, во пракса ретко се покренуваат кривични постапки против работодавачи по смртен случај или тешка повреда на работното место. Дел од работодавачите не обезбедуваат задолжителни обуки и заштитна опрема, што дополнително го зголемува ризикот за вработените.

Податоците и сведоштвата укажуваат дека, и покрај постојната законска рамка, безбедноста при работа и понатаму останува сериозен предизвик, кој бара посистемски пристап, построг надзор и реална одговорност.