ЕУ подготвува нацрт-заклучок: Бугари во Устав како услов за продолжување на преговорите

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

ЕУ подготвува нацрт-заклучок: Бугари во Устав како услов за продолжување на преговорите

01 декември 2025

• од Станча Јаќимовски

Во нацрт-заклучоците што ги подготвува Европскиот совет за претстојниот декемвриски состанок, Македонија повторно се повикува да ја исполни преземената обврска – да ги спроведе уставните измени за да може преговарачкиот процес да се деблокира и да се одржи нова меѓувладина конференција без одлагање.

Поддршка за интеграцијата, но и охрабрување за побрзи реформи

Според документот, Советот на ЕУ ја поздравува посветеноста на земјата кон европската интеграција и ја охрабрува да ги засили напорите за реформи, особено во областите кои се клучни за пристапниот процес. Во заклучоците се истакнува дека земјата „сè уште не ги завршила уставните измени што ги прифатила“, со што останува главниот услов за продолжување на преговорите.

Европската комисија и Европскиот совет потврдуваат дека се подготвени да свикаат нова меѓувладина конференција „без понатамошни одложувања или нови политички одлуки“, веднаш штом земјата ги заврши уставните измени согласно своите внатрешни процедури.

Уставни измени и регионални обврски

Македонија во јуни 2022 го прифати таканаречениот Францускиот предлог, одобрен од сите земји-членки. Согласно преговарачката рамка, Бугарите мора да се вклучат во преамбулата на Уставот и во деловите што се однесуваат на заедниците, а земјата да се придржува до Договорот за пријателство, добрососедство и соработка од 2017 и неговите протоколи.

Во текстот се подвлекува и потребата од „брза и решителна акција“ за исполнување на критериумите од првиот кластер „Фундаментални вредности“, особено владеењето на правото.

Владеење на правото: Без напредок, потребна решителна акција

Во делот за реформите, Советот се повикува на наодите од последниот извештај на Европската комисија во кој е наведено дека „немало напредок во областа на владеењето на правото“ во текот на изминатата година.

Заклучоците ја нагласуваат и потребата од заштита на независноста и интегритетот на судството. Земјата се повикува да го зајакне Судскиот совет согласно препораките од 2023 и мислењето на Венецијанската комисија.

Советот и Европската комисија исто така инсистираат на зајакнување на борбата против корупцијата и организираниот криминал, особено преку ефективни истраги, пресуди и конфискација на имот во случаи на корупција од високо ниво.

Нов Кривичен законик како приоритет

Во документот, Европскиот совет ја повикува земјата да усвои нов Кривичен законик усогласен со правото на ЕУ и меѓународните стандарди. Законикот се очекува да ги адресира и измените од септември 2023 кога беа намалени казните за злоупотреба на службената должност, што доведе до застарување на бројни судски процеси.

Напредок, но и задачи во администрацијата и границите

Во останатите пасуси, се очекува Фронтекс да биде споменат позитивно заради соработката во граничното управување, а да се поздрави и координацијата на земјата со ЕУ во надворешната политика и санкциите.

Нацрт-документот забележува напредок и во реформата на јавната администрација, но подвлекува дека модернизацијата и зајакнувањето на капацитетите мора да продолжат.

Усвојување на заклучоците кон средината на декември

Се очекува земјите-членки да ги усвојат нацрт-заклучоците едногласно на 16 декември во Брисел. Текстот се базира на извештаите на Европската комисија објавени во ноември и се однесува и на другите земји од Западен Балкан: Албанија, Црна Гора, Србија, Косово и Босна и Херцеговина, како и на Украина, Молдавија и Грузија.