МВР: Средба на министерот Тошковски со косовскиот министер за внатрешни работи Свечла - 31 ЈУЛИ 2024

Делегации на МВР на Македонија и Косово остварија билатерална средба за унапредување на соработката

31. јули 2024 - Денеска, делегација на Министерството за внатрешни работи на Република Македонија, предводена од министерот Панче Тошковски, оствари значајна билатерална средба со делегација на Министерството за внатрешни работи на Косово, предводена од министерот Џелал Свечла.

На средбата, која се одржа во рамките на интензивирање на пријателските врски помеѓу двете министерства, акцентот беше ставен на унапредувањето на меѓусебната соработка и зголемување на безбедноста во регионот.

„На денешната билатерална средба со косовскиот колега заеднички ја потврдивме извонредната полициска соработка што ја имаме, со надеж дека дополнително ќе ја подобриме, со цел да имаме побезбеден регион, вистинска борба против организираниот криминал и да имаме поефикасен и побрз трансфер на луѓе и економски стоки преку граничните премини“, изјави министерот Тошковски.

Тошковски истакна дека двете страни констатирале дека „One stop“ системот за побрз трансфер на граѓани е круцијален и дека неговото ставање во функција треба да биде приоритет во иднината. Тој нагласи дека, како одговорни политичари, задолжени се да го поедностават преминувањето на границите, а притоа да се почитуваат постоечките процедури за безбедносни проверки.

Министерот за внатрешни работи на Косово, Џелал Свечла, се согласи со Тошковски, истакнувајќи дека соработката меѓу двете министерства е одлична и дека постои заложба за нула толеранција кон криминалот.

„Се согласивме дека има уште потенцијал и место за поголема соработка, особено во борбата против организираниот криминал, тероризмот и трговијата со луѓе, во правец кон доброто на граѓаните на двете земји“, рече Свечла, додавајќи дека целта е да се олесни преминувањето на границите, а притоа да има и поуспешна борба против организираниот криминал.

Оваа средба е значаен чекор напред во усилијата на двете земји за зајакнување на безбедноста и соработката во справувањето со криминалните активности во регионот.