Обвинителката Ристоска бара јавно извинување од премиерот Мицкоски поради навреди и притисок врз нејзината работа

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Обвинителката Ристоска бара јавно извинување од премиерот Мицкоски поради навреди и притисок врз нејзината работа

09 јануари 2026

• од Станча Јаќимовски

Јавната обвинителка Ленче Ристоска побара јавно извинување и повлекување на навредливите и, како што наведува, целосно измислени тврдења што премиерот Христијан Мицкоски ги изнесе во неодамнешно интервју за порталот „Вечер.мк“. Повод за реакцијата се изјавите во кои Мицкоски, без да ја спомене по име, ја нарече „медиокритет“ и потврдно се согласи со квалификацијата дека станува збор за „клиентелистичко-политичка матрица“, при што од контекстот јасно се заклучува дека се однесуваат на Ристоска.

Обвинителката ваквите изјави ги оценува како навреди и неосновани професионални дисквалификации кои директно го нарушуваат нејзиниот личен и професионален интегритет. Таа информира дека веќе презела институционални и лични чекори за заштита на својата чест, углед и самостојност во вршењето на јавнообвинителската функција.

„Во интервјуто претседателот на Владата изнесува неточни и понижувачки вредносни судови, имплицирајќи дека сум ‘медиокритет’ со ‘клиентелистичко-политичка матрица’, а дополнително ме поврза и со целосно измислени тврдења за изјави кои не сум ги дала, со очигледна тенденција да се доведе во прашање мојот професионален интегритет“, наведува Ристоска во писмената реакција.

Таа писмено го известила премиерот со барање за јавно извинување и повлекување на спорните наводи, а воедно доставила и известување до Советот на јавните обвинители. Во дописот до Советот укажува дека ваквиот јавен говор од страна на премиерот претставува нарушување на самостојноста на јавниот обвинител.

Ристоска нагласува дека актуелниот контекст ја прави ситуацијата особено чувствителна, имајќи предвид дека премиерот Мицкоски воедно е и претседател и законски застапник на политичката партија ВМРО-ДПМНЕ, која е опфатена со кривични постапки во кои таа постапува како јавен обвинител.

„Претседателот на Владата има јасен правен интерес од исходот на овие постапки. Поради тоа, изјавите ги доживувам како несоодветен притисок врз мојата работа и обид да се влијае врз моето постапување и одлучување“, наведува таа.

Ристоска е јавна обвинителка во ОЈО Скопје, обвинителка за врски со Европравда и поранешен член на згаснатото Специјално јавно обвинителство. Таа и понатаму ги застапува предметите „Талир 1“ и „Талир 2“, кои се однесуваат на незаконско финансирање на ВМРО-ДПМНЕ и во кои се бара и конфискација на партиското седиште.

Наводите за кои реагира Ристоска беа изнесени од Мицкоски во интервју поврзано со реформските закони во правосудството и предложените измени на Кривичниот законик. Во тој контекст, премиерот остро ги критикуваше поединците од поранешното СЈО кои реагираа на законските решенија, оценувајќи ги како „медиокритети“ со политичка агенда.

Ова не е прв судир меѓу Ристоска и ВМРО-ДПМНЕ. Во октомври минатата година таа остро реагираше на партиско соопштение во кое беше нарекувана „тажен симбол за неправда“ и „ѕвезда на пропаднатото СЈО“, по што исто така побара јавно извинување и најави можност за тужба.

Ристоска во повеќе наврати истакна дека како јавен обвинител има не само право, туку и обврска јавно да реагира кога се загрозуваат независноста на обвинителството, владеењето на правото и нејзиниот професионален интегритет, потенцирајќи дека нејзината работа е насочена исклучиво кон заштита на јавниот интерес и борба против криминалот, без оглед на политичката припадност на сторителите.