Уапсен Македонец за обид за убиство на Димитар Стојанов - Митко Русија и неговиот син

Бугарската полиција уапси двајца осомничени — 50-годишен Македонец и 43-годишен граѓанин на Бугарија— за обид за убиство на познатиот лихвар Димитар Стојанов, попознат како Митко Русија, и неговиот син. Обидот за убиство се случил на 1 септември 2024 година во Софија.

Според информациите од бугарската полиција, нападот бил внимателно планиран од страна на тројца извршители. Двајца од нив се веќе приведени. Напаѓачите детално го проучувале движењето на своите цели и го избрале местото за напад без видео надзор и со густи грмушки каде што можеле да се сокријат. По нападот, осомничените избегале со џип со украдени регистарски таблички, кој подоцна го оставиле во населбата „Исток“ во Софија.

Полицијата воспоставила деноноќен надзор на возилото, но откако никој не се појавил да го побара, започнала детална анализа на џипот. Од возилото биле земени примероци за барутни честички и ДНК, што довело до следење на осомничените.

На 29 април бил извршен претрес во домот на лице за кое постоело сомнение дека продал оружје на напаѓачите. Таму полицијата пронашла голем арсенал на огнено оружје, меѓу кои и експлозиви.

Шефот на софиската полиција, Љубомир Николов, изјави дека Митко Русија претходно преживеал уште три обиди за убиство, што укажува дека има многу непријатели и дека откривањето на нарачателот на последниот напад ќе потрае. Полицијата е убедена дека станува збор за нарачан напад, бидејќи извршителите и жртвите не се познавале лично.

Овој настан предизвика големо внимание во Бугарија, а полицијата продолжува со истрагата за да го открие нарачателот и третиот извршител.