1800 денари за народот, 78% за функционерите – нова епизода од државната неправда
Минималната плата ќе порасне за 1.800 денари, но платите на функционерите скокнаа за дури 78%. Веста предизвика бурни реакции во јавноста, особено откако стана јасно дека владината одлука за усогласување на минималецот била потпишана без согласност од синдикатите.
Министерот за економија и труд, Бесар Дурмиши, објасни дека одлуката била неопходна за да се избегне целосна блокада во исплатата на мартовските плати.
„Замислете што ќе се случеше ако не ја потпишев Одлуката. Законски мораше да се знае точната сума до 31 март. Во спротивно, ќе дојдеше до блокада на институциите и на работодавачите. Синдикатите немаат важечка репрезентативност, па согласно законот, моравме да постапиме“, изјави министерот.
Тој најави дека е веќе формирана комисија која ќе ја утврди репрезентативноста на синдикалните организации, по што повторно ќе се свика Економско-социјалниот совет.
„Штом се утврди кој синдикат има репрезентативност, ќе го свикам Советот. Таму ќе се слушнат сите аргументи за минималната плата, и ако има подобар предлог, Владата ќе го поддржи“, додаде Дурмиши.
Според него, секој има право на протест во демократско општество, но сепак упати апел до синдикатите барањата да ги искажат институционално, а не на улица.
На новинарско прашање дали зголемувањето од 1.800 денари е доволно за достоинствен живот на работникот, министерот не даде директен одговор.
Граѓаните и синдикатите реагираат дека разликата меѓу зголемувањето на платите на работниците и функционерите е неприфатлива и недостоинствена. Според нив, вистинскиот дијалог и одговорноста кон работниците треба да бидат приоритет, особено во време на економска неизвесност.