Бујар Османи: Без внесување на Бугарите во Уставот, нема европска иднина

Доколку Северна Македонија одржи предвремени парламентарни избори во текот на годинава, земјата би можела да добие прв вистински четиригодишен реформски прозорец за приближување кон Европската Унија, оцени поранешниот министер за надворешни работи и потпретседател на ДУИ, Бујар Османи.

Говорејќи на конференција организирана од поранешниот претседател на Словенија, Борут Пахор, Османи истакна дека токму сега се отвора можност за рестартирање на реформскиот процес што би ја однел земјата поблиску до ЕУ, прв пат по две децении.

„Ако имаме избори оваа година, ќе го отвориме нашиот прв четиригодишен реформски прозорец кон Европската Унија во последните 20 години“, изјави Османи.

Како клучен услов за продолжување на европската интеграција, Османи ја посочи уставната реформа, при што најважна е измената со која Бугарите ќе бидат вклучени како уставна категорија. Оваа измена е дел од обврските што произлегуваат од преговорите со ЕУ и е предуслов за отворање на следната фаза од пристапниот процес.

„Без внесувањето на Бугарите во Уставот, процесот ќе остане заглавен, а можноста за напредок ќе се изгуби. Тоа е прашање на зрелост и визија за иднината“, нагласи Османи.

Тој укажа и на сериозни предизвици, и внатрешни и надворешни, кои ја забавуваат европската интеграција на земјата. Османи остро ја критикуваше, како што ја нарече, „политичка олигархиска оска“ која, според него, го блокира напредокот.

„Имаме политичка оска што не сака да го доврши пристапниот процес во ЕУ, туку сака да го држи заробен во постојана јамка. Тоа е оска што ја демонтира суштината на Охридскиот договор, кој ја одржуваше меѓуетничката хармонија и кохезија“, рече Османи.

Тој додаде дека оваа состојба предизвикува разочараност кај граѓаните, кои сè почесто го напуштаат својот дом и стануваат граѓани на ЕУ преку соседните земји. „Не како сон, туку како бегство“, нагласи Османи.

Во неговото излагање, Османи го истакна и парадоксот со кој се соочува земјата: „Имаме држава надвор од ЕУ, управувана од сили што ја влечат назад, населена со граѓани на ЕУ кои одамна тргнаа напред.“

На крајот, Османи заклучи дека оваа ситуација не е само демографска криза, туку вистински стратешки апсурд, кој бара итна политичка акција и одлучни реформи за да се избегне понатамошна изолација на Северна Македонија од европските интеграции.