Бугарскиот пратеник Јорданов: Нема македонска држава, народ и јазик пред средината на 20 век

Во рамки на дискусија во Европскиот парламент, бугарскиот пратеник Тошко Јорданов упати сериозна критика кон Европската комисија за човекови права, реагирајќи на наводите од извештај во кој Бугарија се обвинува за одбивање на регистрација на организацијата ОМО Илинден. Според Јорданов, станува збор за обид за политички притисок и мешање во внатрешните работи на една суверена држава.

„Бугарија нема да поддржува сепаратистички организации. Ние сме демократска држава, но истовремено и одлучни кога станува збор за заштита на нашиот уставен поредок и националниот интерес,“ изјави Јорданов.

Тој нагласи дека Европскиот суд за човекови права, според него, во некои случаи ги надминува своите овластувања, особено кога се занимава со чувствителни прашања поврзани со националниот идентитет и историјата. „Да ги тргнеме емоциите и идеолошките конструкции – до средината на 20 век немаме македонска држава, ниту македонски народ, а македонски јазик – ниту во средниот век, ниту денес. Тоа се факти од историјата, а не прашања за политичка дебата,“ додаде тој.

Јорданов посочи дека вистинската загриженост на Европскиот суд треба да биде насочена кон реални случаи на прекршување на човековите права, како, според него, неодамнешните напади врз лица кои се идентификуваат како Бугари во соседни земји и оштетувањето на бугарски културни институции.

Изјавата на Јорданов предизвика мешани реакции меѓу европратениците. Додека некои беа изненадени од неговиот директен настап, други му честитаа за, како што рекоа, јасното и храбро изложување на бугарската позиција.

Овој настап доаѓа во време на чувствителни односи меѓу Бугарија и Северна Македонија, особено во контекст на европската интеграција и историските прашања кои сè уште предизвикуваат поделби меѓу двете земји.