Денеска се празнува Преподобен Тит Чудотворец и Светите маченици Амфијан и Едесија
Се празнува споменот на Преподобен Тит Чудотворец, како и на Светите маченици Амфијан и Едесија – сведоци на длабока вера, пожртвуваност и светост.
Преподобен Тит Чудотворец – столб на Црквата
Од најрана младост, Преподобен Тит Го возљуби Христа со сето свое срце, одрекувајќи се од суетата на светот. Заминувајќи во манастир, тој се посвети на духовниот живот, живеејќи во строго послушание и длабоко смирение. Со овие добродетели тој не само што ги надмина своите браќа, туку и многумина од луѓето во своето време.
За време на иконоборната ерес, Тит се покажа како непоколеблив бранител на вистината и на светите икони, застанувајќи цврсто на страната на православната вера. Благодарение на неговото смирение и чистота, Бог му дарува чудотворни дарови – и додека беше жив, и по неговата смрт. Почина во 9 век, оставајќи по себе голем број ученици што го следеа во неговата побожност.
Тропар на Преподобен Тит:
Небесата сведочат за твоите подвизи, преподобен оче наш Тите, земјата те восфалува со сведоштво на твоите ученици... Моли се за нас, исповедниче на Православието, чудотворче, и биди пред Христа застапник за нашето спасение.
Светите маченици Амфијан и Едесија – браќа по тело и по дух
Овие двајца браќа, родени во Патара од угледни, но незнабожечки родители, ја пронајдоа вистината на Христовата вера додека студираа во градот Вирит. По враќањето дома, не можеа да живеат во незнабожничка средина, па се преселија во Кесарија Палестинска, каде под духовно раководство на презвитерот Памфил се зацврстија во верата.
Во времето на жестоките гонења на христијаните под царот Максимин, Амфијан, иако само дваесетгодишен, со голема храброст го разобличи жртвоприносот на идолите, што го извршуваше кнезот Урбан. За ова беше жестоко мачен и конечно удавен во морето, од кое неговото тело чудесно се врати на брегот.
Неговиот брат Едесиј подоцна беше испратен во рудници, а потоа во Египет, каде во Александрија го разобличи кнезот Ероклеј за нечовечкото постапување со христијанските жени. И тој заврши маченички, потопен во морето, следејќи го својот брат како верен сведок на Христа.
Тропар на Светите маченици:
Страдалници свети, ревносни воини... секоја желба телесна ја изгоревте со пламенот на верата... за нас молете се од градините на светлината.