ДУИ: Поднесовме кривична против министерот за правда за попречување на албанскиот јазик

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

ДУИ: Поднесовме кривична против министерот за правда за попречување на албанскиот јазик

18 февруари 2026

• од Станча Јаќимовски

Демократската унија за интеграција (ДУИ) вчера поднесе кривична пријава против министерот за правда, обвинувајќи го за прекршување на Уставот и законите со попречување на имплементацијата на Законот за употреба на јазиците. Пријавата беше поднесена пред Основното јавно обвинителство, а од партијата велат дека станува збор за сериозно нарушување на уставно загарантираните права на граѓаните Албанци.

На прес-конференција одржана пред Јавното обвинителство, претставници на ДУИ истакнаа дека причината за поднесувањето на пријавата е одбивањето на Министерството за правда да организира правосуден испит на албански јазик. Според нив, со ваквиот потег директно се прекршуваат член 7 и член 9 од Уставот, како и членовите 1, 2, 3 и 9 од Законот за употреба на јазиците, со кои албанскиот јазик е утврден како службен јазик покрај македонскиот и се обврзуваат институциите да обезбедат негова употреба во службените постапки и документи.

Од партијата посочуваат дека со ова се врши неисполнување на службените должности на штета на уставните и законските права на граѓаните, што, според нив, е спротивно и на член 353 од Кривичниот законик, кој се однесува на злоупотреба на службена должност и овластување. Дополнително, тие наведуваат дека ваквите дејствија претставуваат повреда на рамноправноста на граѓаните согласно член 137 од Кривичниот законик, како и повреда на одредбите од Законот за спречување и заштита од дискриминација, кој забранува дискриминација врз основа на јазик и етничка припадност.

„Неспроведувањето на законот и негирањето на ова право испраќа дискриминаторски пораки и ризикува продлабочување на тензиите во мултиетничко општество“, порачаа од ДУИ, нагласувајќи дека институциите се законски обврзани да овозможат службените процеси и документи да се спроведуваат и на јазикот што го зборуваат најмалку 20 проценти од граѓаните.

Од ДУИ сметаат дека Министерството за правда, со тоа што не го понудило правосудниот испит на албански јазик, го прекршило уставниот принцип на рамноправност и постапило спротивно на правниот поредок на државата. Со поднесената кривична пријава, партијата бара од Обвинителството веднаш да отвори истрага, случајот да биде процесиран пред надлежен суд и да се гарантира спроведување на законот без каква било форма на дискриминација.

Кривичната пријава следува по јавните изјави на министерот за правда Игор Филков, кој на почетокот од месецот информираше дека во Министерството била разгледана петиција од студенти во врска со полагањето на правосудниот испит на албански јазик. Тој посочи дека биле анализирани сите релевантни уставни и законски одредби, при што нагласи дека Законот за употреба на јазиците овозможува употреба на албанскиот јазик како службен во постапките пред институциите, но неговата примена не може да се разгледува изолирано од другите системски закони што го уредуваат функционирањето на правосудството.

Во дебатата се вклучи и премиерот Христијан Мицкоски, кој, повикувајќи се на амандманот V од Уставот, изјави дека правосудниот испит може да се полага и на албански јазик, но претходно тоа треба да биде утврдено со закон. Според него, актуелниот закон не ја дозволува таа можност, но тој е подготвен прашањето да се регулира со нов закон, со кој испитот би можел да се полага не само на албански, туку и на јазиците на другите народи наведени во Преамбулата на Уставот.

Случајот отвора поширока дебата за примената на Законот за употреба на јазиците и за односот меѓу уставните гаранции и системските закони во правосудството, во контекст на обезбедување еднаквост и недискриминација во мултиетничкото општество.