ДУИ: Уставниот суд е политички инструмент против еднаквоста и Охридскиот договор

ДУИ со длабока загриженост и јавно негодување ја осуди, како што велат, сè поотворената политичка улога на Уставниот суд на Северна Македонија. Од партијата обвинуваат дека судот не само што го напуштил својот мандат како независна институција, туку се претворил во инструмент на власта за поткопување на темелите на меѓуетничката еднаквост и Охридскиот рамковен договор.

ДУИ особено ги осуди јавните изјави на претседателот на Уставниот суд, кој, според нив, ги минимизира меѓуетничките проблеми и ги претставува како „средство за политички цели“. Овие ставови, како што оценуваат, се не само неодговорни, туку и крајно опасни, бидејќи имаат цел да ја одвлечат вниманието од, како што велат, системската дискриминација што сè уште постои и да ја прикријат институционалната офанзива против правата стекнати со крв и жртви.

„Уставниот суд повеќе не се крие зад наводен неутралитет – тој делува како параполитички продолжеток на актуелната власт. Најавата дека одлуката за Законот за употреба на јазиците ќе се донесе по изборите не е случајност, туку дел од добро испланиран проект: привремено да се зачува политичкиот проект кај Албанците преку квази-претставници без легитимитет, а потоа да се удри врз сите постигнувања обезбедени преку Охридскиот договор,“ стои во соопштението.

ДУИ предупредува дека долго време кружеле информации за договор помеѓу Владата и Уставниот суд за укинување на Законот за јазиците по изборите, и сега, како што велат, тие гласини се претвораат во свршен чин. Овие случувања, според нив, ја разоткриваат горчливата вистина: еднаквоста и соживотот се цел на удар токму од институциите што треба да ги штитат.

„Претстојните избори повеќе не се само избори – тие се референдум за албанскиот јазик, за граѓанската еднаквост и за правецот на нашата држава. Дали ова ќе биде држава на сите граѓани или режим кој ја користи правдата за да го потисне идентитетот и правата на Албанците?“ прашуваат од партијата.

ДУИ порачува дека нема да дозволи никому – ниту на влада, ниту на суд, ниту на која било институција – да ги користи механизмите на државата за враќање на неправдите од минатото. „Охридскиот договор е документ на мир, но и државотворен договор. Кој го допира него, си игра со стабилноста и заедничката иднина на оваа земја. Нашиот глас ќе се слушне. Еднаквоста не е предмет на преговори. Охридскиот договор нема да се погази,“ се заклучува во соопштението.