Хорор во Кичевско: Мечка го нападна додека се враќал од нива, доби 300.000 денари оштета

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Хорор во Кичевско: Мечка го нападна додека се враќал од нива, доби 300.000 денари оштета

24 февруари 2026

• од Станча Јаќимовски

Жител на кичевско село доби 300.000 денари отштета од државата, откако бил нападнат и гризнат од мечка во август 2022 година. Одлуката ја донел Апелациониот суд во Гостивар, кој ја преиначил пресудата на Основниот суд во Кичево и го намалил првично досудениот износ од 350.000 денари.

Напад без провокација

Инцидентот се случил додека селанецот пеш се враќал од својата нива кон домот. Според наводите во пресудата, без никаква провокација и без повод, бил нападнат од диво животно – мечка. Таа го совладала и го гризнала, нанесувајќи му повеќе телесни повреди.

Повредите биле сериозни: рани од гризнување на десната страна од челото и слепоочницата, нагмечени дланки на двете раце и повреди на натколеницата. Повредениот бил хоспитализиран во болницата во Прилеп, каде што му биле хируршки обработени раните и бил подложен на шиење. Примил и вакцина против беснило, а поради силниот страв и траумата, побарал и психијатриска помош.

Според наодите, болките со силен интензитет траеле околу десет дена, особено во пределот на главата и дланките, како резултат на самите повреди и медицинските интервенции.

Жалба за висината на отштетата

Првостепениот суд во Кичево му досудил 350.000 денари за нематеријална штета. Сепак, оштетениот поднел жалба до Апелациониот суд во Гостивар, барајќи повисок износ. Тој сметал дека природата, видот и интензитетот на повредите не биле соодветно земени предвид при одлучувањето.

Особено спорен за него бил делот од образложението во кој првостепениот суд навел дека при утврдувањето на висината на надоместот ја ценел околноста што тужителот бил нападнат од една мечка, а не од повеќе мечки кои би делувале како чопор. Според судот, тоа влијаело на проценката дека стравот и физичката болка имале помала тежина во споредба со евентуален напад од повеќе животни.

Оштетениот преку својот адвокат истакнал дека државата има обврска да го заштити животот и здравјето на граѓаните, како и да преземе превентивни мерки за спречување вакви напади. Според него, наместо намалување на отштетата, институциите требало да покажат поголема одговорност и грижа.

Намалена отштета од Апелација

Апелациониот суд во Гостивар, сепак, оценил дека првостепениот суд досудил превисок износ. Со преиначување на пресудата, судот одлучил на оштетениот да му се исплатат вкупно 300.000 денари за нематеријална штета поради повреда на личните права.

Од вкупната сума:

100.000 денари се за претрпени физички болки,
100.000 денари за претрпен страв,
50.000 денари за душевни болки поради намалена општа животна активност,
50.000 денари за душевни болки поради нагрденост.

Со оваа одлука, случајот доби правосилна разрешница, а прашањето за одговорноста на државата во случаи на напади од диви животни повторно се наметна во јавноста.