Историски чин: МПЦ-ОА и БПЦ заеднички го прославија празникот на Светите Кирил и Методиј
Во духот на братска љубов и православно единство, Македонската православна црква – Охридска архиепископија (МПЦ-ОА) и Бугарската православна црква (БПЦ) за првпат заеднички го прославија празникот на Светите рамноапостолни Кирил и Методиј. Овој историски настан се одржа на 11 мај 2025 година во Силистра, Бугарија – денот кога БПЦ, според својот календар, го чествува споменот на светите браќа.
Со оваа заедничка прослава, двете сестрински православни цркви испратија силна порака за духовна блискост и заедничка почит кон делото на Светите Кирил и Методиј, кои се столбови на словенската писменост, култура и вера. Настанот се смета за прв голем чекор во насока на заедничко чествување на значајни духовни и историски личности и моменти кои ги поврзуваат македонскиот и бугарскиот народ.
Во навечерието на празникот, вечерната богослужба во Соборниот храм „Свети Петар и Павле“ во Силистра ја предводеше Митрополитот Преспанско-Пелагониски Петар, во присуство на домаќинот Митрополитот Доростолски Јаков и неговиот викарен епископ Борис.
На самиот ден на празникот, Божествената Литургија ја началствуваше Митрополитот Јаков, заедно со Митрополитот Петар, Митрополитот Кумановско-Осоговски Григориј, пензионираниот Митрополит Јосиф, Викарниот Епископ Велички Никола и Епископот Борис. Литургијата обедини свештеници и ѓакони од двете цркви, создавајќи атмосфера на вистинска духовна радост и заедништво.
Овој чин на заедничко литургиско празнување на Светите Кирил и Методиј следи по постигнатата согласност во Историската комисија меѓу Скопје и Софија, во рамки на Договорот за добрососедство, со кој двете земји се обврзаа на заедничко одбележување на значајни личности од заедничката историја.
„Оваа заедничка молитвена радост беше сведоштво за духовната поврзаност на двата православни народи, Македонскиот и Бугарскиот, кои преку светото дело на Светите Браќа Кирил и Методиј се втемелија во Христовата вистина,“ се истакнува во соопштението на Преспанско-пелагониската епархија.
Историскиот настан се смета за силен симбол на надминување на недоразбирањата од минатото и поттик за понатамошно зацврстување на духовните и културни врски меѓу двата народа.