Кузеска: СДСМ е за целосна интеграција во ЕУ, БРИКС и изолација не се опција

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Кузеска: СДСМ е за целосна интеграција во ЕУ, БРИКС и изолација не се опција

22 февруари 2026

• од Станча Јаќимовски

Портпаролката на Социјалдемократски сојуз на Македонија, Богданка Кузеска, денеска на прес-конференција истакна дека партијата останува цврсто определена за целосна интеграција на Северна Македонија во Европската Унија, нагласувајќи дека алтернативи како БРИКС или изолација не доаѓаат предвид.

Кузеска потенцираше дека до денес нема официјална одлука од Европска комисија, Европски совет или Европски парламент која предвидува прием на земја како полноправна членка без гласачки права. Според неа, доколку таква позиција стане официјална во рамки на Европската Унија, тогаш би можело да се разгледува, но засега такво сценарио не постои.

„СДСМ е за целосна интеграција на Северна Македонија во Европската Униија, вклучително и полноправно членство со сите права, меѓу кои и правото на глас“, изјави Кузеска.

Во своето обраќање, таа упати критики кон ВМРО-ДПМНЕ и лидерот Христијан Мицкоски, обвинувајќи ги за антиевропска кампања. Според неа, наместо да ги прифатат критиките од ЕУ како резултат на неисполнети обврски и неопходни реформи, тие ја претставуваат Унијата како фактор на „булинг“ кон Македонија.

Кузеска оцени дека со блокирање на уставните измени и создавање тензии со соседите, опозицијата ја држи државата во стагнација. Таа додаде дека европската интеграција подразбира поголема транспарентност, запирање на нетранспарентни тендери, партиски вработувања и злоупотреба на буџетот, што, според неа, не им одговара на нивните политички противници.

„За нас нема друга алтернатива. Ниту БРИКС, ниту изолацијата не се опција“, порача Кузеска.

Контроверзи околу изборот на почесен конзул во Србија

Кузеска се осврна и на информацијата дека српското Министерство за надворешни работи пред околу еден месец му ја предало егзекватурата на почесниот конзул на Северна Македонија во Србија, Душан Адамовиќ, со седиште на Конзулатот во Панчево.

Според неа, изборот на Адамовиќ отвора сериозни прашања. Таа посочи дека на социјалната мрежа X можат да се најдат негови стари објави во кои, како што наведе, се користи изразот „Српска Македонија“.

Кузеска истакна дека Адамовиќ е поврзан со Српска напредна странка, сестринска партија на ВМРО-ДПМНЕ, и дека бил дел од нејзините партиски структури. Дополнително, во дел од српските медиуми, како што наведе, се објавувале информации за наводни афери и контроверзии поврзани со него.

Таа го повика премиерот Мицкоски јавно да одговори на прашањата како е избран Адамовиќ за почесен конзул и дали биле направени соодветни безбедносни проверки.

„Како од толку угледни бизнисмени во Србија владата го избрала Адамовиќ за почесен конзул на Македонија? Каква е неговата врска со Мицкоски?“, праша Кузеска.

Од СДСМ оценуваат дека случајот отвора сериозен сомнеж и бараат транспарентни одговори од Владата.