Николоски: Шенгенските ограничувања можат да ја колабираат македонската економија

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Николоски: Шенгенските ограничувања можат да ја колабираат македонската економија

24 јануари 2026

• од Станча Јаќимовски

Новите правила за влез и престој на професионалните возачи во земјите од Шенген зоната претставуваат сериозна закана за македонската, но и за регионалната економија, предупреди вицепремиерот и министер за транспорт Александар Николоски. Според него, станува збор за проблем со далекусежни последици што може да предизвика колапс на транспортниот сектор и значително да ја наруши извозната способност на земјите од Западен Балкан.

Во интервју за Радио Лидер, Николоски истакна дека Владата повеќе од една година укажува на ризиците поврзани со воведувањето на електронската евиденција и новиот режим за престој на возачите во Европската унија, но без конкретен одговор од надлежните европски институции.

„Се работи за огромен економски проблем кој може целосно да ја колабира македонската и регионалната економија. Иако имав жестока размена на аргументи со надлежните институции во ЕУ, директно во Брисел, за жал не наидов на разбирање“, изјави Николоски.

Тој нагласи дека последиците нема да ги почувствува само транспортниот сектор, туку и сите извозно ориентирани компании, за кои транспортот е клучна алка во синџирот на снабдување.

Протести и блокади на граничните премини

Како реакција на новите правила, од понеделник се најавени седумдневни протести и блокади на граничните премини кон земјите од Шенген зоната. Во протестите ќе учествуваат превозници од Македонија, Косово, Србија, Црна Гора и Босна и Херцеговина.

„Нашите економии се мали и доминантно ориентирани кон извоз. Ако компаниите не можат да извезуваат, запира целата економска активност. Дополнително, ако трошоците за превоз се зголемат за 3 до 5 проценти, домашните производи стануваат неконкурентни на европскиот пазар“, предупреди Николоски.

Според него, особено погодени ќе бидат компаниите во Технолошко-индустриските развојни зони, кои обезбедуваат значителен дел од вработеноста и девизниот прилив во државата.

Без одговор од Европската унија

И покрај континуираните разговори со претставници на Европската унија, засега нема најави за одложување или корекција на новите правила. Николоски смета дека радикалните мерки и протестите се единствениот начин да се привлече вниманието кон проблемот.

„Владата има целосно разбирање за македонските транспортери, ги поддржува нивните барања и смета дека ова мора да се реши – или со одложување на електронскиот систем за професионалните возачи, или со воведување посебен режим на работни визи“, рече тој.

Според него, Европската унија не ја согледува сериозноста на последиците што новите правила ги носат за земјите од Западен Балкан, оценувајќи дека станува збор за „класична бирократија, игнорирање и недоволна посветеност на реален проблем“.

Ризик од заминување на компании

Николоски предупреди и на ризикот од заминување на компании од Македонија поради зголемените транспортни трошоци.

„Ако македонска компанија што извезува во Германија мора да ангажира германски превозник, трошокот се зголемува за 3 до 5 проценти. Тоа ги прави производите неконкурентни. Една компанија со која разговарав најавува загуби од 1,5 милиони евра неделно“, истакна тој.

Дополнително, новите услови значително ќе го ограничат времето кое професионалните возачи ќе можат да го поминуваат во рамки на Европската унија – за околу 50 проценти – што, според Николоски, целосно го прави транспортниот бизнис неисплатлив.

Предупредувањата од Владата и од транспортниот сектор сè погласно укажуваат дека без итна реакција и флексибилност од европските институции, последиците може да бидат сериозни не само за Македонија, туку и за целиот регион.