Поскап јавен и такси превоз во Скопје? Превозниците предупредуваат на последици од зголемувањето на минималната плата

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Поскап јавен и такси превоз во Скопје? Превозниците предупредуваат на последици од зголемувањето на минималната плата

27 јануари 2026

• од Станча Јаќимовски

Можно зголемување на цените на јавниот и такси превозот во Скопје или дури и редуцирање на автобускиот сообраќај, најавуваат синдикатите на превозници доколку дојде до значително зголемување на минималната плата, како што бара Сојузот на синдикатите на Македонија. Според нив, без државна поддршка, ваквата мерка би можела сериозно да го загрози функционирањето на јавниот превоз во главниот град.

Приватните автобуски превозници предупредуваат дека покачувањето на минималната плата за околу 200 евра би значело дополнителен финансиски товар што тие не би можеле самостојно да го издржат. Како што велат, тоа би ги довело во ситуација или да ги зголемат цените на автобускиот билет или да ги раскинат договорите со Град Скопје, што би резултирало со редуциран јавен превоз.

Претседателот на Синдикатот на приватни автобуски превозници на град Скопје, Кемал Муриќ, изрази сериозна загриженост поради барањата за зголемување на минималецот. Тој посочи дека најголемиот дел од превозниците се микро-фирми со еден до двајца вработени и дека веќе подолг период се соочуваат со финансиски проблеми.

„Во изминатиот период имавме сериозни тешкотии поради неисплатени обврски од страна на Град Скопје, особено за време на мандатот на градоначалничката Данела Арсовска, со која и денес имаме судски спор. За да можеме да ги извршуваме обврските кон граѓаните, бевме приморани да земаме кредити. Зголемување на минималната плата за 50 проценти би значело дека повеќе нема да можеме да работиме без загуби“, изјави Муриќ за МИА.

Тој додава дека во таков случај штетата нема да ја трпат само превозниците, туку и граѓаните на Скопје, кои или ќе останат без соодветен јавен превоз или ќе се соочат со повисоки цени на билетите.

Синдикатот смета дека единствено одржливо решение е државно субвенционирање, пракса која, според Муриќ, е вообичаена во многу европски земји, каде што јавниот градски превоз често е непрофитабилен без институционална поддршка. Синдикатот застапува околу 200 приватни превозници.

Сличен став имаат и од Синдикатот на автотакси превозници на град Скопје. Претседателот Ѓорѓи Мариновски вели дека таксистите се самофинансирани и секое зголемување на платата автоматски значи и повисоки придонеси.

„Со зголемување на трошоците се намалува заработката. За да се покријат тие расходи, би морало да се зголеми и цената на такси услугите, но тоа пак би довело до намалување на бројот на патници. Веќе тешко ги покриваме и сегашните придонеси“, истакна Мариновски.

Тој посочи дека решението го гледаат исклучиво во државна поддршка, односно субвенционирање на разликата што би настанала со евентуалното зголемување на минималната плата.

„Ако државата, на пример, покрие износ од околу 3.000 денари, тоа би било одржливо. Во спротивно, целиот товар ќе падне на таксистите, кои немаат поволности како други занаетчии“, додаде Мариновски, чиј синдикат обединува 18 фирми со околу 1.500 членови.

Синдикатите апелираат до сите засегнати страни да пристапат разумно и со дијалог кон решавање на ова прашање, со цел да се заштитат и работниците и јавниот интерес, без дополнителен удар врз граѓаните на Скопје.