ССМ излегува на улица на 28 јануари, ќе се бара минимална плата од 600 евра

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

ССМ излегува на улица на 28 јануари, ќе се бара минимална плата од 600 евра

23 јануари 2026

• од Станча Јаќимовски

Сојузот на синдикатите на Македонија (ССМ) официјално го потврди датумот за масовен протест што ќе се одржи на 28 јануари, со почеток во 17 часот, пред зградата на ССМ. Поводот за протестот, како што соопштува синдикатот, е одбивањето на Владата и работодавачите да прифатат значајно зголемување на платите во услови на континуиран раст на животните трошоци.

Главното барање на ССМ е минимална плата од 600 евра, како и зголемување на сите останати плати за 6.000 денари. Синдикалното раководство порачува дека нема да отстапи од овие позиции и дека протестот претставува само прв чекор доколку институциите продолжат, како што велат, да „купуваат време“ наместо да носат суштински решенија.

Маршрутата на протестот е јасно дефинирана и симболична: од зградата на ССМ, преку Собранието, потоа пред Стопанската комора, со завршница пред Владата. Со ваквиот избор на локации, синдикатот директно ја адресира одговорноста кај трите клучни чинители што, според нив, ја обликуваат платната политика – законодавната власт, работодавачите и извршната власт. Пораката што се испраќа е дека платите не се само пазарна категорија, туку резултат на политичко-економски одлуки кои со години се носат на товар на работниците.

Претседателот на ССМ, Слободан Трендафилов, еден ден по најавата изјави дека засега не чувствува директни притисоци, но очекува силна масовност и од јавниот и од приватниот сектор. Според него, причината е очигледна: платите стагнираат, додека трошоците за живот континуирано растат. Како дополнителен аргумент, ССМ укажува дека синдикалната кошничка за јануари е зголемена за околу 1.000 денари, што, според синдикатот, е јасен показател дека одложувањето на платните корекции директно го урива животниот стандард.

Од Владата, пак, повторно го истакнаа ставот дека ќе го почитуваат секој договор што ќе биде постигнат меѓу синдикатите и работодавачите. Иако ваквата позиција формално се повикува на социјален дијалог, синдикатите ја читаат како повлекување на државата од активна улога во ублажување на нерамнотежата меѓу трудот и капиталот. Особено во ситуација кога, според ССМ, разговорите траат предолго, а резултатите се минимални и не го следат реалното поскапување.

Во меѓувреме, дел од институциите излегоа со тврдења дека во одредени сектори веќе има значителни покачувања на платите. Како пример се наведува здравствениот сектор, каде што платите, според официјални податоци, се зголемени за 17 проценти, а капитацијата за матичните лекари за 33 проценти. Сепак, за ССМ овие бројки не ја менуваат суштинската слика, бидејќи станува збор за секторски и нерамномерни корекции кои не го решаваат проблемот на ниските примања кај голем дел од работниците.

Трендафилов јавно изрази разочараност и од фактот што дел од синдикатите се задоволуваат со законското усогласување на платите во март, оценувајќи дека таквиот пристап ја релативизира кризата на животниот стандард. Токму затоа, повикот за масовност има јасна цел – платната дебата да се префрли од преговарачките маси на улица, каде што политиката многу потешко може да го игнорира незадоволството.

Протестот на 28 јануари, според ССМ, не е само борба за повисока минимална плата. Тој е судир околу моделот на управување со економските и социјалните политики: дали државата ќе продолжи со одложувања и префрлање одговорност меѓу „социјалните партнери“, или ќе се отвори сериозна дебата за тоа како се распределува товарот од инфлацијата, продуктивноста и буџетските приоритети. Во услови кога платата станува централна социјална тема, исходот од оваа синдикална мобилизација ќе биде тест и за Владата и за работодавачите, но и за реалната моќ на организираниот труд во Македонија.