Трајановски: Институциите реагираат дури по трагедии, системот мора да делува превентивно

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Трајановски: Институциите реагираат дури по трагедии, системот мора да делува превентивно

10 март 2026

• од Станча Јаќимовски

Потпретседателот на СДСМ, Александар Трајановски, изјави дека одлуката за откажување на Осмомартовскиот марш во Богданци е донесена поради новонастанатата ситуација во државата и претставува израз на поддршка за граѓанските протести против насилството врз жените. Во интервју за емисијата „360 степени“ на МРТ 1, тој нагласи дека одлуката нема политичка конотација.

Според Трајановски, присуството на претставници на СДСМ на протестот во паркот „Жена борец“ не било политички мотивирано, туку израз на граѓанска поддршка за борбата против насилството врз жените.

„Јас како граѓанин на оваа држава имам право да излезам и да поддржам сè што мислам дека е во интерес на граѓаните. Поддршката што ја дадовме беше порака дека сме против насилството врз жените. Наместо да го реализираме нашиот марш во Богданци, сметавме дека е поважно да бидеме заедно со граѓаните и да испратиме силна порака без партиски обележја“, изјави Трајановски.

Тој додаде дека актуелната состојба со насилството врз жените е сериозна и бара заедничка реакција од целото општество.

Во интервјуто Трајановски се осврна и на барањето за оставка на министерот за внатрешни работи Панче Тошковски. Според него, повикот не е обид за политизирање на трагичните случаи поврзани со фемицид и семејно насилство, туку реакција на нефункционирањето на институциите.

„Кај нас секогаш треба да се случи некоја катастрофа за институциите да почнат да реагираат. Неколку дена се работи интензивно, а потоа повторно се заборава. Тоа го видовме и во други случаи, кога по трагедиите се правеа проверки, но претходно со месеци ништо не се преземаше“, рече Трајановски.

Тој посочи дека особено загрижува фактот што трагедијата со убиството на млада девојка се случила и покрај повеќе пријави до институциите.

„Имало повеќе пријави до Центарот за социјални работи и до МВР, а сепак никој не ја препознал сериозноста на ситуацијата. Одговорноста тука се сведува на институциите кои требало да реагираат навреме“, изјави тој.

Според Трајановски, токму поради вакви пропусти се бара оставка од министерот за внатрешни работи.

„Проблемот е што системот реагира откако ќе се случи трагедијата, наместо да делува превентивно. Тоа беше пораката и од вчерашниот протест, кој имаше голема масовност“, нагласи потпретседателот на СДСМ.

Тој смета дека една од главните причини за ваквата состојба е недостатокот на одговорност во институциите, но и пошироки социолошки и културолошки фактори.

„Државата мора да навлезе во секоја пора од општеството – да се подигне свеста за семејното насилство, булингот и други проблеми. Ако институциите не можат да се справат со ова, тогаш треба да се спроведат силни кампањи за подигање на јавната свест“, рече Трајановски.

Тој додаде дека протестите имаат цел да ја разбудат државата и институциите да почнат посериозно да се справуваат со проблемот.

„Државата две години спие и тоа е факт. Некој мора да ги отвори очите – дали тоа ќе го прави граѓанскиот сектор или опозицијата, но проблемот мора да се стави на виделина“, истакна Трајановски.