28 јануари 2026
• од Станча Јаќимовски
Управата за јавни приходи (УЈП) информира дека континуирано презема активности во рамките на своите надлежности со цел даночните обврзници непречено да ги исполнат законските обврски за поднесување на ДДВ-04 пријавите. Реакцијата следува по јавните забелешки дека дел од обврзниците, наводно поради технички проблеми во системите на УЈП, не биле во можност навремено да ја поднесат пријавата за последниот даночен период.
Од УЈП нагласуваат дека во периодот на масовно поднесување на ДДВ-пријавите не биле евидентирани технички проблеми во функционирањето на електронските системи. Како дел од превентивните активности, институцијата, користејќи ги сите расположливи официјални канали, уште пред истекот на законскиот рок објавила соопштение на својата веб-страница на 23 јануари 2026 година, со апел до даночните обврзници навремено да ги достават потребните документи до сметководителите и да ги исполнат обврските за поднесување и плаќање на данокот на додадена вредност.
Во соопштението, УЈП повика на навремено исполнување на месечните и тримесечните ДДВ-обврски со цел да се избегнат стрес, доцнења и дополнителни финансиски трошоци.
Покрај тоа, како што информираат од Управата, на 22 јануари 2026 година биле испратени превентивни електронски пораки до 2.534 даночни обврзници кои имаат обврска за поднесување ДДВ-пријава за периодот од 1 до 31 декември 2025 година. Следниот ден, на 23 јануари, вакви известувања биле доставени и до дополнителни 11.967 даночни обврзници за даночниот период од 1 октомври до 31 декември 2025 година.
Од УЈП потенцираат дека во текот на целиот период била обезбедена континуирана техничка поддршка и постојан увид во функционалноста на системите, при што не биле забележани застои или дефекти.
Дополнително, на 26 јануари 2026 година на официјалната веб-страница било објавено и соопштение со укажување дека масовното поднесување на голем број ДДВ-04 пријави во последниот ден може значително да го оптовари електронскиот систем, што може да резултира со подолго време на чекање за обработка на пријавите.
Од Управата повторно апелираат до даночните обврзници обврските да ги исполнуваат навремено, со цел да се избегнат евентуални технички оптоварувања и непотребни компликации.
Ненадминливи Понуди Дневно
4.8 (10276 рецензии)
Заштедете 152.00 ден

