10 февруари 2026
• од Станча Јаќимовски
Розовата долина во Бугарија, сместена во околината на градот Казанлак, има реални шанси да стане дел од нематеријалното културно наследство на УНЕСКО. Оваа иницијатива се смета за исклучително значајна, бидејќи може да донесе не само меѓународно признание, туку и значителни економски придобивки за регионот и за целиот сектор поврзан со производството на розово масло.
Кандидатурата ја подготвува Националната асоцијација за етерични масла, парфимерија и козметика, во соработка со локалната општина, како и со Министерството за земјоделство и храна на Бугарија. Паралелно со тоа, се работи и на регистрација на регионот во програмата „Глобално важни системи за земјоделско наследство“ (GIAHS) при Организација за храна и земјоделство на ОН.
Основната цел на оваа иницијатива е зачувување и популаризација на нематеријалното културно наследство поврзано со одгледувањето и преработката на маслодајната роза, како и зацврстување на Розовата долина како симбол на бугарскиот културен идентитет. Токму во регионот на Казанлак се произведува најквалитетното розово масло во светот, што го потврдуваат бројни истражувања на Институтот за розата и други специјализирани лаборатории. Овие наоди се прифатени и од водечки француски парфимери, кои го ценат квалитетот и уникатните својства на маслото од овој регион.
Кандидатурата на Бугарија не го опфаќа само земјоделското производство, туку и поширокиот културен и историски контекст на Розовата долина: традициите, обичаите, фолклорот, читалиштата, музеите и улогата на локалните заедници. Процесот се реализира во координација со четири министерства – за земјоделство и храна, за туризам, за култура и за надворешни работи – што покажува колку е широк и стратешки значаен овој проект.
Доколку регистрацијата во програмата на ФАО се реализира, тоа би било прво вакво признание за Бугарија. Според иницијаторите, станува збор за силен меѓународен сигнал дека Розовата долина претставува живо наследство и одржлив извор на егзистенција. Очекувањата се дека меѓународното признание нема да има само симболична вредност, туку ќе донесе и реални економски придобивки – преку зголемена конкурентност на производите од Розовата долина и директна поддршка на локалните производители.
„Пратениците нека дојдат и пешки – Собранието утре ќе работи“, порача Гаши
Ненадминливи Понуди Дневно
4.8 (10276 рецензии)
Заштедете 152.00 ден

