12 февруари 2026
• од Станча Јаќимовски
Пратениците од владејачкото мнозинство не ги поддржаа предложените измени на Законот за работни односи поднесени од Левица, со кои се предвидуваше дополнителна заштита на бремените работнички од отказ. Од партијата соопштија дека со негласањето ќе продолжи неизвесноста за жените вработени на определено време, особено во услови на сериозен пад на наталитетот во државата.
Според Левица, иако формално постои законска забрана за отказ поради бременост, практиката покажува дека многу жени, особено оние со договори на определено време, остануваат без работа по истекот на договорот. Како што наведуваат, работодавачите ја користат законската празнина со тоа што не ги продолжуваат договорите, оставајќи ги бремените работнички без приход и сигурност во период кога им е најпотребна стабилност.
Со предложените измени, Левица бараше воведување автоматска трансформација на договорот од определено во неопределено време во случај на бременост. Ова решение, според партијата, ќе спречеше бременоста да биде индиректна причина за губење на работното место.
„Ниедна жена не смее да биде казнета затоа што одлучила да стане мајка. Бремените работнички имаат право на достоинство, здравје и сигурност. Кога жена е принудена да ја крие бременоста од страв дека ќе остане без работа, тоа не е индивидуален проблем, туку општествен пораз“, се наведува во соопштението.
Од Левица апелираат до владејачкото мнозинство да не ја игнорира, како што велат, системската дискриминација со која се соочуваат бремените работнички и да иницира законски измени што ќе стават крај на, како што оценуваат, голготата и неизвесноста за жените кои одлучиле да станат мајки.
Ненадминливи Понуди Дневно
4.8 (10276 рецензии)
Заштедете 152.00 ден

