ЕУ без јасен одговор кога ќе се реши проблемот со визите за камионџиите

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

ЕУ без јасен одговор кога ќе се реши проблемот со визите за камионџиите

31 јануари 2026

• од Станча Јаќимовски

Европската Унија сè уште не може да потврди дали во текот на оваа година ќе се најде решение за долгогодишниот проблем со визите на камионџиите од Западен Балкан. На пладневниот брифинг во седиштето на Европска Унија во Брисел беше најавено дека веќе следната недела ќе се одржи состанок на ресорните министри за транспорт, на кој ќе се разговара токму за ова прашање. Иако проблемот беше оценет како „важен“, од Брисел не дадоа гаранции дека решение ќе има до крајот на годината.

Портпаролот на Европска комисија, Маркус Ламерт, изјави дека Комисијата е свесна оти голем број професионалци имаат потреба од престој во Шенген зоната подолг од дозволените 90 дена во период од 180 дена. „Ова се однесува на професии како што се камионџиите, но и спортистите и уметниците кои се на турнеја. Прашањето е поврзано и со националните правила и со постојните билатерални договори и му се посветува целосно внимание“, нагласи Ламерт.

Тој потсети дека во новообјавената Стратегија за визи е предвидено Комисијата тесно да соработува со земјите-членки со цел да се идентификуваат прагматични решенија кои ќе обезбедат и безбедност и економска корист за Унијата, но и правна јасност за патниците. Како можност беше спомнато и воведување ново законодавство со специфични правила за продолжен краток престој на ниво на ЕУ.

По четири дена блокади на граничните премини, македонските и црногорските транспортери се повлекоа откако беше објавено усвојувањето на Стратегијата за визи. Сепак, блокадите продолжуваат во Србија и Босна и Херцеговина. Во Србија моментално се блокирани 22 излези и 19 влезови за товарни возила. Тамошните превозници ја поздравуваат новата визна стратегија и очекуваат воведување правила за продолжен престој, но оценуваат дека остануваат нерешени прашања.

За 3 февруари е најавен состанок на министрите од сите земји на Западен Балкан со претставници на Европската комисија, на кој централна тема ќе биде престојот на превозниците од регионот во Шенген зоната. Очекувањата се дека разговорите ќе донесат појасна насока, но засега без конкретен рок за конечна одлука.