12 февруари 2026
• од Станча Јаќимовски
Двегодишно дете е во тешка здравствена состојба откако било нападнато од глутница кучиња во битолската населба Баир. Инцидентот, кој ја вознемири јавноста, се случил додека детето си играло во сопствениот двор, по што кучињата влегле во дворот и го нападнале.
Според изјавите на семејството, нападот бил особено брутален. Кучињата го растргнале детето и го влечеле околу 200 метри надвор од дворот. Детето се здобило со сериозни повреди во пределот на вратот, стомакот и препоните и во моментов се лекува на скопските клиники. Семејството очекува долг и неизвесен процес на закрепнување.
Самедин Канановски, вујко на детето, ги отфрли шпекулациите дека семејството ги одгледувало кучињата. Тој нагласи дека станува збор за глутница без чип и дека тие не биле во сопственост на семејството.
Реагирајќи на соопштение од прифатилиштето Хачико, во кое било алудирано дека кучињата биле „маалски“ и хранети од локалното население, Канановски изјави:
„Не може глутница да биде одгледувана од еден човек“, прашувајќи дали кучињата што ги хранат дуќанџиите на Широк Сокак треба да се сметаат за домашни миленици или за скитници.
Семејството ја вперува одговорноста кон Општина Битола, обвинувајќи ја за негрижа и недоволни мерки за справување со проблемот со бездомните кучиња.
Според Канановски, кучињата се присутни низ целиот град и граѓаните се чувствуваат небезбедно.
„Луѓето се плашат од кучињата низ целиот град… буквално на 100 метри од Општината му стојат кучињата. Општината не презема ништо“, изјави тој.
Според важечките процедури, нападите од бездомни кучиња треба да се пријават во Секторот за инспекциски работи во рамки на локалната самоуправа или до надлежното прифатилиште. Потоа, прифатилиштето има обврска да го извести официјалниот ветеринар и да преземе соодветни мерки.
Случајот повторно ја отвори дебатата за контролата на бездомните животни во градовите и одговорноста на институциите во заштитата на безбедноста на граѓаните.
Џорџа Мелони им оддаде почит на илјадниците Италијанци убиени од режимот на Тито
Филипче: Врв на безобразие – нема пари за плати, а има за нов владин авион
Ненадминливи Понуди Дневно
4.8 (10276 рецензии)
Заштедете 152.00 ден

