Бугарија со втор најголем раст на бензински возила во ЕУ во 2025 година

Бугарија се искачи на второто место во Европската Унија по раст на регистрацијата на нови бензински автомобили во првиот квартал од 2025 година, покажуваат најновите податоци од Асоцијацијата на европските автомобилски производители (ACEA). Од вкупно 11.608 новорегистрирани возила во периодот јануари–март, дури 9622 биле со бензински мотор – значителен пораст што ја става Бугарија веднаш зад Латвија, каде што зголемувањето достигна 16,3%.

Алтернативните возила сè уште зад бензинските и дизелите

Иако се бележи раст и кај електричните возила – 12,5% или вкупно 531 нови регистрации – сепак тие остануваат далеку зад конвенционалните погони. Plug-in хибридите бележат пад и се сведени на нешто над 100 единици, додека класичните хибриди растат за речиси 40%, достигнувајќи 302 возила. Сепак, дури и заедно, овие три категории не успеаја да го надминат бројот на дизел возила, кои изнесуваат 1042 – иако кај нив е забележан пад од 26,9%.

Посебно за март, статистиката покажува дека алтернативните погони забележуваат забрзан раст – 46,8% кај електричните автомобили и 36,6% кај класичните хибриди.

Што се случува на ниво на ЕУ?

На европско ниво, првиот квартал од 2025 е одбележан со мал пад од 1,9% во вкупната регистрација на нови автомобили, што се припишува на „непредвидливиот глобален контекст“ на автомобилскиот пазар. Електричните возила сега имаат пазарен удел од 15,2%, што иако претставува раст, е „далеку од очекуваните нивоа“, според ACEA.

Во Германија, Белгија и Холандија се бележат значајни порастови, но Франција покажува спротивен тренд со пад на новите регистрации на електрични возила.

Најголем пазарен удел имаат класичните хибриди – 35,5%, со добри резултати на сите големи пазари. Следат бензинските возила со 28,7%, но со намалување во повеќето земји освен во Бугарија и Латвија.

Кои се лидерите меѓу производителите?

Volkswagen Group останува доминантен играч во Европа со вкупно 724.045 продадени возила во првото тримесечје. Само VW брендот продал 301.586 автомобили, што му носи прво место со раст од скоро 10% на годишно ниво.

На второ место е Toyota со 221.558 возила, но со пад од 6,8% споредено со истиот период лани. Renault со 168.960 возила го надминува Skoda за третата позиција.

Од друга страна, Tesla, која е сè почесто бојкотирана од корисниците, бележи драматичен пад од 45%, продавајќи нешто над 36.000 возила.