Договорите со Rheinmetall за отворање фабрики во Бугарија во завршна фаза

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

Договорите со Rheinmetall за отворање фабрики во Бугарија во завршна фаза

27 август 2025

• од Гоце Кически

Бугарија е на чекор до финализирање на стратешко партнерство со германскиот одбранбен гигант Rheinmetall, откако денеска беше потврдено дека договорите за изградба на два производствени погони во земјата се во завршна фаза и би можеле да бидат потпишани за само три недели.

Веста беше објавена на свеченото отворање на најголемата артилериска фабрика во Европа, лоцирана во близина на Хановер, настан на кој присуствуваа генералниот секретар на НАТО Марк Руте, претседателот на Бугарија Румен Радев и премиерот на Романија.

Две фабрики – за гранати и барут

Планираните инвестиции опфаќаат изградба на фабрика за 155-милиметарски гранати и уште една за производство на барут. Претседателот Радев заедно со извршниот директор на Rheinmetall, Армин Папергер, нагласија дека разговорите се во завршна фаза, а очекувањата се потписот на договорите да се случи во рок од три недели.

„Убеден сум дека во следните три до четири недели ќе најдеме решение и ќе започнеме голема инвестициона програма“, изјави Папергер, притоа изразувајќи благодарност кон Радев за поддршката.

Долгорочна стратешка соработка

Радев истакна дека станува збор за многу повеќе од едноставно заедничко производство. „Ова е долгорочно стратешко партнерство кое ќе отвори нови работни места, ќе донесе нови технологии и ќе придонесе за модернизација на бугарските вооружени сили“, рече тој.

Претседателот дополнително откри дека се разговара и за трет заеднички проект – изградба на погон за производство на автотранспортна техника, што би ја заменило застарената возна флота на бугарската армија.

Финансиски модел и европска поддршка

Според Христо Гаџев, претставник на бугарската влада, проектот е во подготовка подолго време и уште во јули се поднесени документи за европско финансирање. Тој нагласи дека моделот на инвестиција ќе биде „50 на 50“ – половина од бугарската држава и половина приватен капитал од Rheinmetall.

„Сакаме да изградиме фабрика за кратко време, по моделот што го видовме во Германија, и тоа без да се оптоварува државниот буџет“, изјави Гаџев.

Поддршка од НАТО

Генералниот секретар на НАТО Марк Руте оцени дека Европа е исправена пред сериозни безбедносни предизвици поради Русија и Кина и дека зајакнувањето на одбранбената индустрија е приоритет.

„Денеска годишното производство на муниција во Европа е шест пати поголемо од пред две години и се очекува да достигне два милиона парчиња до крајот на годината. Rheinmetall има огромен удел во тоа“, истакна Руте.

Со оваа инвестиција, Бугарија се позиционира како клучен фактор во европската одбранбена индустрија и станува дел од пошироката европска одбранбена екосистема.