Фон дер Лајен: Напредокот на Црна Гора и Албанија е инспирација за Западен Балкан

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

Фон дер Лајен: Напредокот на Црна Гора и Албанија е инспирација за Западен Балкан

18 декември 2025

• од Станча Јаќимовски

Претседателката на Европската комисија, Урсула фон дер Лајен, изјави дека Албанија и Црна Гора постигнале импресивен напредок во процесот на европска интеграција, оценувајќи дека нивните резултати треба да послужат како силна инспирација за останатите земји од Западен Балкан.

По самитот ЕУ–Западен Балкан, одржан синоќа во Брисел, Фон дер Лајен во писмена изјава нагласи дека проширувањето на Европската унија, за првпат по една деценија, повторно станува реална и остварлива можност.

„Сакам да го поздравам огромниот напредок што го постигнаа Албанија и Црна Гора. Она што тие го постигнаа е навистина импресивно. Нивниот напредок е извор на инспирација за останатите партнери од Западен Балкан и испраќа силна порака до светот за привлечноста на европската понуда – понуда на солидарност, можности и стабилност“, истакна Фон дер Лајен.

Таа додаде дека Европската комисија интензивно работи на постепена интеграција на земјите од регионот, со цел европската перспектива да стане конкретна реалност. Во тој контекст, таа го нагласи значењето на Планот за раст за Западен Балкан, кој, според неа, комбинира реформи што овозможуваат пристап до ресурси и финансиски средства кои, пак, ги поддржуваат реформските процеси.

Фон дер Лајен информираше дека досега земјите од Западен Балкан добиле околу 18 милијарди евра преку инвестицискиот план на ЕУ, што веќе дава видливи резултати.

„Од 2021 година наваму, трговијата во регионот е дуплирана, трговијата со стоки и услуги порасна за 19 проценти, а намаленото чекање на границите заштеди вкупно повеќе од 20 години време“, рече таа, оценувајќи дека регионот во моментов има историска можност што мора да се искористи.

Според медиумите, Србија беше единствената земја од регионот што немаше свој претставник на самитот во Брисел.

На крајот од состанокот, лидерите на земјите членки на ЕУ и на Западен Балкан усвоија заедничка изјава со која уште еднаш ја потврдија целосната и јасна посветеност на европската перспектива и идното членство на земјите од Западен Балкан во Европската унија.