Македонија, Косово и Албанија со поддршка за Трамп: Светот поделено реагира на операцијата во Венецуела

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

Македонија, Косово и Албанија со поддршка за Трамп: Светот поделено реагира на операцијата во Венецуела

04 јануари 2026

• од Станча Јаќимовски

Воената операција на Соединетите Американски Држави што резултираше со апсење на венецуелскиот претседател Николас Мадуро предизвика силни и поделени реакции на глобално ниво. Настанот, кој се случи во саботата, отвори сериозни прашања за меѓународното право, суверенитетот на државите и можните последици врз регионалната и светската стабилност.

Американскиот претседател Доналд Трамп соопшти дека Мадуро и неговата сопруга ќе бидат префрлени во Њујорк, каде ќе се соочат со федерални обвиненија. Тој ја опиша операцијата како „спектакуларна“, нагласувајќи дека станува збор за акција „каковашто светот нема видено од Втората светска војна“.

Меѓу ретките држави што јавно ја поддржаа американската интервенција се најдоа Северна Македонија, Косово и Албанија. Министерот за надворешни работи на Северна Македонија, Тимко Муцунски, преку платформата X изјави дека земјата „стои зад Соединетите Американски Држави и венецуелскиот народ во борбата за слобода и демократија“.

Сосема спротивна беше реакцијата на официјален Каракас. Венецуелската влада ја осуди операцијата како „исклучително сериозна воена агресија“ и прогласи вонредна состојба, предупредувајќи на сериозни последици по националната безбедност.

Русија побара од Вашингтон да ја преиспита својата позиција и да го ослободи, како што наведе, „легално избраниот претседател на суверена држава“. Кина, пак, соопшти дека е „длабоко шокирана“ од употребата на сила и остро ја осуди американската акција против Венецуела и нејзиниот претседател.

Остра осуда пристигна и од Иран, кој ја оцени операцијата како флагрантно кршење на суверенитетот и територијалниот интегритет на Венецуела. Сличен став зазедоа и Мексико и Бразил. Мексиканските власти предупредија дека интервенцијата сериозно ја поткопува регионалната стабилност, додека бразилскиот претседател Луиз Инасио Лула да Силва ја нарече акцијата „тешка навреда“ за венецуелскиот суверенитет.

Куба, како еден од најблиските сојузници на Венецуела, ја осуди американската операција како „државен тероризам“ насочен против венецуелскиот народ.

Во Европа, реакциите беа претежно воздржани и критички. Шпанија понуди посредување со цел мирно решавање на кризата и повика на деескалација. Франција оцени дека операцијата го поткопува меѓународното право и порача дека решенија за кризата не можат да се наметнуваат однадвор. Европската Унија изрази загриженост и апелираше на почитување на меѓународните норми, истовремено повторувајќи дека Мадуро нема демократски легитимитет.

Британскиот премиер Кир Стармер изјави дека сите земји мора да го почитуваат меѓународното право и нагласи дека Обединетото Кралство не било вклучено во операцијата, повикувајќи на трпеливост додека не се утврдат сите факти.

Исклучок од европскиот критички тон беше Италија. Премиерката Џорџија Мелони, близок сојузник на Трамп, ја оцени американската воена акција како „легитимна и одбранбена“, што претставува редок пример на поддршка од голема европска држава.

Израел исто така ја поздрави операцијата, оценувајќи дека Вашингтон постапува како „лидер на слободниот свет“.

Генералниот секретар на Обединетите нации, Антонио Гутереш, изрази длабока вознемиреност од настаните, предупредувајќи дека ваквите акции можат да создадат опасен преседан во меѓународните односи.

Операцијата во Венецуела јасно ги истакна длабоките геополитички поделби и отвори ново поглавје на неизвесност во глобалната политика, со потенцијални последици кои допрва ќе се чувствуваат.