Официјално: Бугарија ќе бара нафта и гас под дното на Црното Море!
Бугарската влада склучува стратешки договор со енергетскиот гигант „Шел Експлорејшн енд Продакшн“ за истражување и пронаоѓање на нафта и природен гас во блокот „1-26 Хан Тервел“, кој се наоѓа во исклучивата економска зона на Бугарија во Црното Море.
Официјалната церемонија на потпишување ќе се одржи во вторник, а присуство ќе има и премиерот Росен Жељазков. Договорот ќе го потпишат Министерството за енергетика на Бугарија и претставници од „Шел“, со учество и на министерот за енергетика Жечо Станков, како и извршниот потпретседател на „Шел“ за истражувања, стратегија и портфолио, Јуџин Окпере.
Овој потег се смета за клучен чекор кон искористување на домашните ресурси и јакнење на енергетската независност на земјата – цел која е високо позиционирана на агендата на бугарската влада.
Истражувањата во Црното Море не само што може да откријат нови извори на енергија, туку и да ја зацврстат позицијата на Бугарија како значаен енергетски играч во регионот, во време кога Европа активно работи на намалување на зависноста од увозни енергенси.