САД веруваат дека Израел се подготвува за напад врз Иран

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

САД веруваат дека Израел се подготвува за напад врз Иран – можен воен удар во наредните денови

12 јуни 2025

• од Гоце Кически

Американските власти веруваат дека Израел е подготвен да изврши напад врз Иран и може да го започне воениот удар врз иранските нуклеарни постројки во наредните денови, јавуваат NBC и CBS, и покрај тоа што дипломатските напори за договор околу иранската нуклеарна програма продолжуваат и се очекува средба во недела во Оман.

Овие извештаи доаѓаат по одлуката на САД да евакуира дел од своите вработени и нивните семејства од регионот, поради страв од можни одмазднички акции од Иран.

Претседателот Доналд Трамп изјави дека веќе не е сигурен во можноста да се постигне договор со Техеран, особено откако Иран инсистира да продолжи со ниско ниво на збогатување на ураниум – нешто што Вашингтон го смета за неприфатливо.

Стар ирански функционер за Ројтерс изјави дека „пријателска“ земја од регионот ја предупредила Техеран за можно израелско бомбардирање. Тој додаде дека тензиите имаат цел да го натераат Иран да попушти пред американскиот притисок за време на разговорите во недела, но нагласи дека Иран нема да се откаже од своето право на збогатување.

NBC, повикувајќи се на пет анонимни извори, објави дека Израел размислува да започне напад врз Иран без американска поддршка. Израел стравува дека САД би можеле да прифатат договор кој нема да ги вклучи нивните барања за целосно запирање на нуклеарното збогатување.

CBS, од своја страна, извести дека израелските сили се „целосно подготвени“ за акција. Извештаите исто така нотираат дека Иран би можел да возврати со напади врз американските бази во Ирак, што било и причината за евакуацијата.

Иранскиот министер за одбрана Азиз Насирзаде предупреди дека во случај на напад, Иран ќе возврати со ракетирање на американски бази низ регионот. Според информации на The New York Times, Иран подготвил план за масовен противнапад со стотици балистички ракети кон Израел.

Во октомври, Иран веќе изврши напад со стотици ракети врз Израел, но поголемиот дел беа пресретнати од израелската ПВО и со помош на сојузниците. Израел подоцна возврати со удари кои, според анализите, сериозно го оштетиле иранскиот ПВО систем.

„Не смеат да имаат нуклеарно оружје. Многу едноставно,“ изјави Трамп. Во интервју во средата тој додаде: „Почнувам да губам надеж дека ќе се откажат од збогатувањето. Очигледно нешто се смени.“

Британскиот поморски центар за трговија предупреди морнарите за можност од воена ескалација што може да ги засегне и пловните патишта.

Сепак, министерот за надворешни работи на Оман, Бадр Албусаиди, потврди дека шестиот круг од преговорите меѓу САД и Иран ќе се одржи во недела во Мускат. Специјалниот пратеник Стив Виткоф ќе се сретне со иранскиот министер Абас Арагчи за да разговараат за најновиот американски предлог.

И покрај уверувањата на Иран дека не настојува да развие нуклеарно оружје, САД се сомневаат во искреноста на тие намери, особено поради нивото на збогатен ураниум кој нема цивилна примена.

„Нуклеарен Иран е егзистенцијална закана за Израел,“ изјави Виткоф во средата во Њујорк. „Мораме да бидеме обединети и решителни да спречиме Иран да го реализира својот смртоносен план.“

Иранската мисија во ОН реагираше дека „заканите со сила нема да ја променат реалноста“ и повтори дека американскиот милитаризам само ја дестабилизира ситуацијата во регионот.

Ситуацијата останува неизвесна, со потенцијален конфликт што може да се разгори во секој момент.