Шопинг преку граница: Зошто македонските граѓани ја одбираат Приштина наместо Скопје?

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

Шопинг преку граница: Зошто македонските граѓани ја одбираат Приштина наместо Скопје?

01 јуни 2025

• од Станча Јаќимовски

Во последните две години, Косово сѐ повеќе станува шопинг оаза за македонските граѓани. Приштина, Феризај и други косовски градови полека, но сигурно ги потиснуваат македонските бутици, нудејќи поевтина и поквалитетна облека која сѐ почесто ги полни багажниците на автомобили со македонски регистарски таблички.

Географската близина и значителните разлики во цените се клучните фактори зад овој тренд. Од Скопје до Приштина има помалку од два часа возење, што го прави шопингот во Косово еднодневна и исплатлива авантура за многумина. Особено активни во овој шопинг-маратон се жителите од северниот и западниот дел на земјата.

„На почетокот бев скептична, но веќе две години облека купувам исклучиво во Приштина. Истата блуза или патики кои во Скопје ги плаќам по 2.500 или 3.000 денари, таму ги наоѓам за околу 1.500 до 1.800 денари“, вели Теа Василевска од Куманово, која редовно патува во главниот град на Косово на секои два месеца.

Ценовната разлика е повеќе од очигледна. Според споредбите, пар патики од познат бренд кои во Македонија чинат 5.500 денари, во Феризај се нудат за 3.500 до 4.000 денари. Јакни кои во Скопје се продаваат за 6.000 денари, во косовските продавници можат да се најдат за околу 4.000 денари. А квалитетни фармерки, кои кај нас достигнуваат и до 3.000 денари, во Косово може да се купат за половина цена.

Покрај поволните цени, македонските купувачи се импресионирани и од богатата понуда. Роберто Стојановски од Скопје вели: „Има продавници за сечиј вкус и џеб, персоналот е љубезен и секогаш подготвен да помогне. Понудата е далеку побогата од онаа кај нас.“

Дополнителна предност е и можноста за плаќање во евра, валута која многумина ја имаат при рака, особено за вакви прекугранични набавки.

Косово, со својата достапност, разновидна понуда и конкурентни цени, се покажа како сериозна конкуренција за македонските продавници. Додека трендот продолжува да расте, македонските трговци ќе треба да најдат нови начини за да ги задржат своите купувачи дома.