Србија стагнира на патот кон ЕУ – остри критики од Тонино Пицула

Србија не бележи напредок во процесот на евроинтеграции, а последната посета на претседателот Александар Вучиќ на Москва дополнително ги нарушува нејзините шанси за приближување кон Европската унија. Ова го изјави европратеникот и известувач за Западен Балкан, Тонино Пицула, за време на гостување на телевизијата N1.

„Заминувањето на Вучиќ во Москва не е незначаен настан – тоа се случи во најнеповолно време, кога политиката на проширување на ЕУ добива на значење за некои земји. За жал, Србија не е меѓу нив“, изјави Пицула, додавајќи дека Белград не покажува доволно посветеност на европскиот пат.

Пицула оцени дека парадата во Москва, по повод Денот на победата, не била само историско одбележување, туку и демонстрација на политичка поддршка за рускиот претседател Владимир Путин. Според него, присуството на Вучиќ на Црвениот плоштад е сериозно политичко прашање, кое ја компромитира довербата на Европската унија кон српските власти.

„Европската унија веќе предупреди дека оние што сакаат да станат членки и се претставуваат како демократски држави, не треба да учествуваат во вакви настани“, истакна Пицула.

Тој исто така посочи дека посетата на Москва предизвикала дополнителен отпор во ЕУ кон идејата дека Србија е подготвена да ги отстрани пречките на својот европски пат. Како што рече, Белград покажува минимален напредок уште од 2012 година, кога доби кандидатски статус, и моментално нема многу простор за оптимизам, особено во однос на отворањето на нови поглавја, како што е кластерот три.

Посетата на претседателот на Европскиот совет, Антонио Кошта, на Белград Пицула ја оцени како значајна, бидејќи има „многу теми за кои треба да се разговара“. Но, тој подвлече дека ваквите дипломатски посети нема да бидат доволни доколку Србија не покаже јасна политичка волја за приближување до европските стандарди и вредности.