Украина оваа зима ќе се снабдува со течен природен гас од Грција

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

СВЕТ

Украина оваа зима ќе се снабдува со течен природен гас од Грција

17 ноември 2025

• од Станча Јаќимовски

Украина во текот на зимскиот период ќе обезбедува течен природен гас (LNG) од Грција, согласно новиот договор потпишан во Атина меѓу грчката државна компанија ДЕПА Трговија и украинската Нафтогаз. Договорот беше склучен во присуство на грчкиот премиер Кирјакос Мицотакис, украинскиот претседател Володимир Зеленски, грчкиот министер за животна средина и енергија Ставрос Папаставру и амбасадорката на САД Кимберли Гилфојл.

Според грчките владини извори, договорот се однесува на периодот од декември 2025 до март 2026 година, а предвидува транспорт на американски LNG преку таканаречената Рута 1, која ја обезбедуваат операторите на преносните системи на Грција, Бугарија, Романија, Молдавија и Украина. Овој енергетски аранжман се оценува како значаен придонес за регионалната и европската енергетска безбедност, особено во зимскиот период кога потрошувачката нагло расте.

Поддршка во услови на руски напади

Зеленски, кој беше во еднодневна работна посета на Грција, посочи дека Украина се соочува со постојани руски напади врз енергетската инфраструктура, при што електраните и гасните постројки често се цел на ракети и беспилотни летала. Според украинскиот претседател, договорот со Грција претставува „важен дел од енергетскиот пакет“ за обезбедување на стабилно снабдување со гас.

Тој изрази благодарност до Грција и САД што го направиле планот остварлив, истакнувајќи дека снабдувањето со газ треба да започне во јануари, со можност за дополнителни долгорочни испораки.

Грција – нов енергетски центар за регионот

Грчкиот премиер Мицотакис нагласи дека со овој договор се активира т.н. Вертикален коридор, што му овозможува на Киев директен пристап до „диверзифицирани и сигурни извори на енергија“. Според него, Грција станува клучен центар за снабдување на централна и источна Европа со американски течен природен гас.

Тој додаде дека овој развој не е важен само за Украина, туку и за пошироката регионална енергетска безбедност и отпорност, потенцирајќи дека Грција се позиционира како стабилен сојузник на Украина.

Разговори за ситуацијата на фронтот и дипломатските можности

На средбите, Зеленски го информирал Мицотакис за актуелната ситуација на фронтот и перспективите за можен дипломатски прекин на огнот. Тој повторно повика на засилен притисок врз Русија, посочувајќи дека Москва ги отфрлила сите можни иницијативи за прекин на непријателствата. Украинскиот лидер ја поздрави поддршката од Грција во рамките на ЕУ, како и ангажманот за враќање на киднапираните украински деца.

Грчкиот премиер изрази длабока загриженост поради ескалацијата на руските напади, потсетувајќи дека за Атина неповредливоста на границите е основен принцип. Тој направи паралела со нерешеното прашање за Кипар, истакнувајќи дека Грција добро го разбира значењето на територијалниот интегритет.

Поддршка и од грчкиот претседател

И грчкиот претседател Константинос Тасулас ја потврди силната поддршка на Атина за Киев, нагласувајќи дека Грција не прифаќа агресивен ревизионизам и никакво прекршување на меѓународното право. Тој порача дека грчката поддршка за Украина ќе остане постојана.

Посетата под високи безбедносни мерки

Поради безбедносни причини, посетата на Зеленски беше објавена дури утрото. Грчката полиција воведе забрана за собири и протести во центарот на Атина од 6 до 22 часот. Ова е прва посета на Зеленски во Атина од август 2023 година, кога присуствуваше на регионална средба по повод 20-годишнината од Солунската агенда.