Арсовска: Наместо вистинска борба против корупција, правите јавен линч

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Арсовска: Наместо вистинска борба против корупција, правите јавен линч

18 декември 2025

• од Станча Јаќимовски

Поранешната градоначалничка на Скопје, Данела Арсовска, упати остра јавна реакција до Државната комисија за спречување на корупцијата (ДКСК), откако нејзиното име се најде на листата на поранешни функционери кои, според Комисијата, не поднеле анкетен лист по престанокот на функцијата. Таа ги обвини антикорупционерите за непрофесионалност, тенденциозност и за, како што вели, обид за „јавен линч“ преку медиумска самопромоција.

Арсовска тврди дека за наводната обврска дознала исклучиво од медиумите, а не преку официјално известување од надлежната институција, што, според неа, претставува сериозен пропуст во работењето на ДКСК.

Во реакцијата таа посочува дека фактот што дури 35 поранешни градоначалници се нашле на истата листа јасно укажува на системски неуспех на Комисијата да ги информира навремено функционерите на кои им престанал мандатот.

„Доколку ја извршувавте вашата функција соодветно и доследно, немаше тенденциозно да покренувате јавен линч за деградација. Да бевте професионални, ќе нè информиравте лично за обврската или барем со официјално соопштение, наместо да правите себепромоција преку медиумите“, наведува Арсовска.

Таа упати и сериозни критики дека ДКСК се фокусира на, како што ги нарекува, административни прекршоци, наместо да се справува со суштинската и, според неа, мултимилионска корупција во државата.

„Добро ќе беше да сработите нешто за вистинскиот криминал и сериозните случаи на корупција во Македонија, како и за институционалните непостапувања во трагични случаи, меѓу кои и трагедијата во Кочани, наместо да се заканувате со прекршочни глоби за обврска за која не сте нè информирале“, стои во нејзината реакција.

Арсовска, која дописот го потпишува и во својство на портпарол за етика и спречување на корупција на Конгресот на Советот на Европа, побара и јавно објаснување за методологијата по која е креирана таканаречената „црна листа“.

„На кој начин ја креиравте листата каде како број еден сте го објавиле моето име? Дали тоа е по азбучен ред, по возраст, по пол, по имотна состојба или по ваше лично убедување и желба за реваншизам?“, прашува Арсовска.

На крајот од реакцијата, таа информира дека поднесува Изјава за имотна состојба, во која наведува дека нема никакви промени во нејзиниот имот во однос на состојбата на денот на завршување на мандатот.