Денес е Цветници: Кое е значењето на празникот предвесник на Велигден

Цветници, познат и како Цветоносна недела и Врбица, е еден од најзначајните подвижни христијански празници, кој секогаш се одбележува во неделата пред Велигден. Овој ден го одбележува славното влегување на Исус Христос во Ерусалим, градот каде што по само неколку дена ќе го доживее своето страдање и распнување.

Симболика и значење

Празникот се празнува во знак на спомен на настанот кога Исус бил пречекан од народот со радост и воодушевување. Луѓето постилале облека и кршеле гранки од дрвја, особено врбови, со кои го покривале патот по кој минувал, славејќи го како цар и месија. Овој чин претставува израз на длабока почит и признание на Христовото божество.

Името „Цветници“ потекнува од токму тие гранки и цвеќиња со кои народот го украсувал патот, додека изразот „Врбица“ потсетува на врбовите гранчиња, кои до денес остануваат симбол на празникот. На тој ден, верниците носат цвеќиња и врбови гранчиња во црква, каде што се осветуваат и потоа се носат дома како благослов.

Лазарова Сабота – Предвесник на празникот

Денот пред Цветници, саботата, е познат како Лазарова Сабота или Лазарица. Според христијанското предание, токму тогаш починал Лазар од Витанија, а Исус го воскреснал следниот ден. Затоа, иако саботата е празничен ден, неделата – Цветници, се смета за поголем и поважен празник.

Христос – Цар на мирот

Еден од клучните моменти во приказната за Цветници е изборот на Исус да влезе во Ерусалим качен на магаре. Според толкувачите на Светото писмо, магарето кај источните народи било симбол на мирот, за разлика од коњите, кои биле поврзувани со војна. Овој чин е длабоко симболичен – Исус не влегува како војсководец, туку како цар на мирот и спасението.

Празникот низ вековите

Цветници се празнува уште од третото столетие, а традицијата е жива и денес. Во текот на вековите, празникот добивал разни облици на одбележување, но секогаш останувал длабоко вкоренет во срцата на верниците како ден на радост, надеж и подготовка за најголемиот христијански празник – Велигден.

Преку симболиката на цвеќето, врбовите гранчиња и песните на радост, празникот Цветници нè потсетува на потребата од духовна чистота, скромност и вера во вистината и љубовта на Христос.