Комисијата утврди дискриминација врз диригентката Дијана Имери Илкоска

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Комисијата утврди дискриминација врз диригентката Дијана Имери Илкоска

01 октомври 2025

• од Станча Јаќимовски

Комисијата за спречување и заштита од дискриминација донесе заклучок дека диригентката Дијана Имери Илкоска била изложена на директна дискриминација врз основа на лични својства во областа на трудот и работните односи од страна на Александар Котевски, поранешен в.д. директор на Филхармонијата на Република Северна Македонија.

Почеток на случајот

Случајот предизвика бурни реакции во јавноста уште на почетокот на оваа година, кога Илкоска го загуби своето работно место во Филхармонијата. Иако ги исполнувала условите за трансформирање на договорот за работа од определено во неопределено време, тоа не било сторено од страна на тогашниот в.д. директор. Неколку дена подоцна, таа била спречена да влезе во институцијата, а нејзиниот уметнички профил како диригент бил избришан од официјалната интернет страница на Филхармонијата.

Ангажман на Комисијата

Во март Илкоска поднесе претставка до Комисијата за спречување и заштита од дискриминација. По разгледување на аргументите и доказите од двете страни, Комисијата утврди дека постоел случај на директна дискриминација.

Во образложението се наведува дека Котевски не дал објаснување зошто не ја завршил започнатата постапка за трансформација на договорот за работа, ниту пак на што се темелел неговиот изненаден пресврт во ставовите веднаш по стапувањето на функцијата.

Забрана за влез и бришење на профилот

Комисијата укажа и на спорната одлука за ограничување на пристапот на Илкоска во институцијата. Иако генералното правило предвидува влез на надворешни лица со претходна дозвола, останува нејасно зошто името на диригентката било посебно истакнато на списокот за ограничен пристап.

Дополнително, поранешниот директор не успеал да докаже дека бришењето на нејзиниот уметнички профил од веб-страницата било техничка грешка. Од доставените податоци произлегува дека профилот бил избришан и повторно вратен на 17 јануари 2025 година, веднаш по јавното реагирање на Илкоска.

Заклучок и препораки

Комисијата оцени дека сите овие постапки, спроведени во краток временски период и насочени кон Илкоска, без легитимна причина или оправдана основа, ја ставиле во понеповолна положба во однос на колегите. Со тоа, според член 8 од Законот за спречување и заштита од дискриминација, се исполнуваат условите за постоење на директна дискриминација.

Како мерка, Комисијата препорача Александар Котевски да ѝ се извини на Дијана Имери Илкоска во рок од 30 дена. Доколку тоа не се случи, Комисијата најави поднесување барање за поведување прекршочна постапка пред надлежен суд.