Левица: Владеењето на ВМРО-ДПМНЕ е опасност за слободата на медиумите

Партијата Левица изрази силна загриженост за состојбата со медиумските слободи во Македонија, посочувајќи дека секогаш кога ВМРО-ДПМНЕ е на власт, слободата на медиумите се доведува во сериозна опасност.

Само за шест месеци од доаѓањето на власт на ВМРО-ДПМНЕ во 2024 година, Македонија падна за дури шест места на Индексот за слобода на медиумите што го изработува организацијата „Репортери без граници“. Со овој пад, државата се најде на 42 место, последна меѓу земјите со „задоволителна“ состојба и со јасна тенденција да премине меѓу оние со „проблематична“ состојба на медиумите.

Во извештајот на „Репортери без граници“ се посочува дека владините функционери покажуваат лоши и понижувачки ставови кон новинарите, а новинарите работат во непријателска и обесхрабрувачка средина. Оваа состојба, велат од Левица, потсетува на времето на груевизмот, кога Македонија беше најлошо рангирана меѓу европските земји според медиумските слободи.

Како особено загрижувачки пример, Левица го посочува законот со кој повторно се овластуваат националните и локалните власти да се рекламираат во медиуми во приватна сопственост. Иако Левица го блокираше овој закон со амандмани, владејачката коалиција го заобиколи тоа користејќи го механизамот „европско знаменце“. Според Левица, овој закон е класичен анти-европски чекор што директно влијае врз пристрасноста на медиумите и нивното провладино однесување.

Партијата нагласува дека слободата на новинарите и медиумите е суштинска за развој на здраво и демократско општество. Во капиталистичкиот систем, каде политичката и бизнис елитата функционираат во тесна симбиоза, медиумите се често подредени на нивните интереси. Објективното и слободно информирање, предупредува Левица, станува прва жртва на оваа зависност. Со доведување на медиумите во ваква положба, ВМРО-ДПМНЕ, според партијата, обезбедува загушување на секоја критика кон своето режимско владеење.