Вештачење во случајот „Ристов“: Пронајдени отпечатоци и ДНК од судијата на фолиите во кои биле сокриени 350.000 евра

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Вештачење во случајот „Ристов“: Пронајдени отпечатоци и ДНК од судијата на фолиите во кои биле сокриени 350.000 евра

03 јули 2026

• од Темелко Тошев

На денешната расправа во Кривичниот суд, форензичарите од МВР ги презентираа доказите кои го вклучуваат апелациониот судија Ѓоко Ристов во случајот со откриената „скриена ризница“ во Неготино. Одбраната се сомнева во автентичноста на доказниот материјал, обвинувајќи за можност од контаминација.

Нови детали во судскиот процес против апелациониот судија Ѓоко Ристов, обвинет за прикривање имот и перење пари. Вештаци од Одделот за форензички испитувања при МВР денеска пред судот потврдија дека на алуминиумските фолии, во кои биле завиткани 350.000 евра пронајдени соѕидани во ѕидот од домот на родителите на обвинетиот во Неготино, се пронајдени траги што водат директно до него.

Што открија вештаците?

Според исказите на вештите лица, од доставените 13 примероци алуминиумска фолија, два биле погодни за анализа. Резултатите покажале присуство на биолошки материјал кој потекнува од обвинетиот Ѓоко Ристов, како и од уште едно непознато лице кое не е во крвно сродство со него.

Обвинителката Искра Хаџи Василева истакна дека изведените докази се клучни за предметот.

„Обвинителството е задоволно од она што беше презентирано. ДНК анализата непобитно потврдува и дообјаснува како е дојдено до биолошките траги и што значат тие во овој предмет“, изјави Хаџи Василева по рочиштето.

Одбраната: „Зошто не се вештачени парите?“

Адвокатот на обвинетиот, Ѕвонко Давидовиќ, изрази сериозни сомнежи во начинот на кој се чувани и обработени доказите. Тој укажа на временскиот јаз од 80 дена од моментот на пронаоѓање на парите до извршеното вештачење, прашувајќи како е можно доказите да не биле соодветно запечатени.

„Парите се предадени на Агенцијата за управување со одземен имот, а вештачењето е направено со месеци подоцна. Спорно е што се вештачат парчиња алуминиумска фолија, а не самите пари, иако зборуваме за сума од 350.000 евра“, нагласи Давидовиќ, алудирајќи на можни пропусти во постапката.

Обвинителството: „Трагите просто постојат“

На ваквите тврдења, обвинителката Хаџи Василева одговори дека приговорите на одбраната немаат правна суштина и служат единствено за одолговлекување на постапката.

„Дури и лаик знае дека биолошките материјали се подложни на контаминација, но ако тие се пронајдени на материјал, тие едноставно постојат. Без оглед дали има и други траги, овие што се пронајдени потекнуваат од обвинетиот Ѓоко Ристов“, заклучи обвинителката.

Следното рочиште е закажано за 14-ти јули, кога се очекува сведочење на уште еден вештак од МВР, по што ќе продолжи изведувањето на доказите од страна на обвинителството.