ВИДЕО: Ги фрлаат дрвата во Вардар, а потоа се чудиме на поплави…
Нова еколошка и институционална срамота доаѓа од Велес, каде видео-снимка, објавена денеска на социјалните мрежи, ги шокира граѓаните. На видеото јасно се гледа како неколку лица, за кои се претпоставува дека се дел од надлежните служби, без никаков срам или страв, фрлаат огромни дрвени трупци директно во реката Вардар.
Без грижа за животната средина, без план, без одговорност – со олеснувачка логика: „Фрли ги во реката, ќе ги префрлиме пак ако треба“.
Иронијата кулминира со гневната забелешка на авторот на видеото:
„Е не, ќе се замараме… ќе трошиме на транспорт. Фрли ги на другата страна, па ако треба, пак ќе ги влечеме до мостот. Алал вера, мајстори!“
Овие слики предизвикаа бран реакции во јавноста. Граѓаните прашуваат – дали ова е начинот на кој институциите се справуваат со јавните ресурси? И уште поважно: што ќе се случи со тие трупци кога ќе надојде Вардар? Колку мостови и домови ќе се најдат во опасност?
Во земја во која поплавите се реална и честа закана, ваквото однесување не е само немарност – тоа е директна провокација на природата. И уште полошо – на здравиот разум.
До овој момент, нема официјална реакција од општинските власти или од надлежните инспекции. Но јавноста бара одговорност – и тоа итно.