(ВИДЕО) Српски историчар Илиќ: Гоце Делчев се изјаснувал како Бугарин
Српскиот историчар Душан Илиќ, кој работи на Институтот за европски студии во Белград, во едно интервју даде свој контроверзен став за личноста и историјата на Гоце Делчев – фигура која и денес предизвикува поделени мислења на Балканот.
Според Илиќ, Гоце Делчев бил основач и „татко“ на денешната „северномакедонска“ нација. Тој укажува дека е тешко прецизно да се каже што точно бил по националност, бидејќи Делчев бил роден во српски град, но се школувал и се изјаснувал како Бугарин.
„Гоце Делчев е роден како унијат, живеел како унијат и умрел како унијат,“ изјавува Илиќ, потенцирајќи дека, и покрај тоа, денес неговите посмртни останки се наоѓаат во православната соборна црква во Скопје – нешто што според него претставува неправда. „Тоа не е во ред. Наместо да биде погребан во Ватикан – како свети Јероним, кој бил Србин,“ вели тој саркастично.
Историчарот понатаму посочува дека комунистичките власти по Втората светска војна, во договор со бугарските и југословенските комунисти, го преместиле телото на Делчев во Скопје. Според него, тоа покажува до кој степен идеологијата влијаела врз интерпретацијата на историјата.
„Во рамките на бугарското унијатско движење се формира суштинската идеја за бугарска посебност,“ истакнува Илиќ, додавајќи дека сето тоа се случувало паралелно со влијанието од Русија.
Со оваа изјава, Душан Илиќ го отвора прашањето за историската вистина и начинот на кој националните митови се градат – не секогаш врз основа на факти, туку често со политичка и идеолошка позадина.