08 ноември 2025
• од Станча Јаќимовски
Свети Димитриј Солунски е еден од најпочитуваните христијански светители, славен низ целиот православен свет. Роден е во градот Солун, од благородни и длабоко побожни родители. Бидејќи долго време немале деца, тие со усрдни молитви Го замолиле Бога за пород и како одговор на нивната вера, им бил подарен единствениот син – Димитриј. Токму затоа, од своето рано детство бил воспитуван со љубов, внимание и во духот на христијанската вера.
По смртта на својот татко, кој бил војвода на Солун, Димитриј бил поставен на истата должност. Но, царот Максимијан, кој бил жесток прогонител на христијаните, му заповедал на младиот војвода да ги гони и уништува следбениците на Христос. Димитриј, меѓутоа, не само што не ја исполнил оваа наредба, туку напротив, јавно го исповедал и проповедал христијанството, поттикнувајќи многумина да поверуваат во Христа.
Кога дознал за тоа, царот се разгневил и, враќајќи се од војна, дошол лично во Солун за да го испита случајот. На судот пред царот, Димитриј со храброст признал дека е христијанин и го разобличил идолопоклонството на Максимијан. Поради ова, царот го фрлил во затвор. Знаејќи дека го очекува маченичка смрт, светиот Димитриј го предал целиот свој имот на својот ученик Луп, заповедајќи му да го раздели на сиромашните. Во затворот, му се јавил ангел Божји кој му рекол: „Мир на тебе, страдалнику Христов, биди храбар!“
Набрзо потоа, по наредба на царот, војниците го пронашле светецот на молитва и го прободеле со копја. Неговото тело било тајно погребано од христијаните, а од неговите мошти започнало да тече свето миро кое исцелувало многу болни. Над неговиот гроб прво била изградена мала црква, а потоа, благодарение на илирскиот војник Леонтиј, кој се излечил со молитва пред моштите, била подигната голема и величествена црква.
Свети Димитриј и по својата смрт продолжил да го штити својот град. Кога царот Јулијан отпадник сакал да ги пренесе моштите од Солун во Цариград, од гробот излегле пламенови искри и се чул глас: „Застанете и не гибајте!“ Така моштите останале засекогаш во Солун, каде и денес се почитуваат како неисцрпен извор на чуда.
Свети Димитриј се смета за небесен заштитник на Солун, а неговото име се спомнува со голема почит и љубов во целиот христијански свет. Русите, пак, го почитуваат и како покровител на Сибир, кој го освоиле во 1581 година. Делата и чудата на свети Димитриј се безбројни – сведоштво за вечната сила на верата, љубовта и жртвата за Христос.
Насер Селмани: Албанските гласачи беа притиснати и манипулирани на изборите
Албин Курти ги пофали Албанците во Северна Македонија и владеењето на ВЛЕН,
Ненадминливи Понуди Дневно
4.8 (10276 рецензии)
Заштедете 152.00 ден

