Акциски контроли во Битола: Затекнати 20 малолетници во ноќни клубови, следуваат пријави
Во раните утрински часови на 13 април, полициски службеници од Секторот за внатрешни работи Битола спроведоа акциска контрола во неколку угостителски објекти и места за забава, кои претходно биле идентификувани како потенцијални локации каде што често се собираат малолетни лица.
Контролите започнале околу 00:30 часот, при што во еден ноќен клуб на улицата „Климент Охридски“ биле затекнати 16 малолетници, додека во друг угостителски објект на булеварот „1-ви Мај“ биле затекнати уште четири деца.
Сите малолетници биле веднаш предадени на нивните родители, а СВР Битола информира дека по целосно документирање на случаите, ќе бидат поднесени соодветни пријави против одговорните лица.
Оваа акција претставува дел од континуираните активности на полицијата за спречување на злоупотреба и заштита на малолетниците, особено во ноќните часови и во објекти кои не се соодветни за нивна возраст. Надлежните најавуваат дека ваквите контроли ќе продолжат и во наредниот период.