Алијанса на Села реагира за блокадата на „Пластичарска“: Граѓаните не смеат да останат без струја

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Алијанса на Села реагира за блокадата на „Пластичарска“: Граѓаните не смеат да останат без струја

26 декември 2025

• од Станча Јаќимовски

Едното од трите крила на Алијансата на Албанците, предводено од Зијадин Села, остро реагира на, како што оценува, честите и долготрајни прекини на електричната енергија во повеќе региони низ државата, нарекувајќи ги енергетски скандал и сериозен институционален неуспех на универзалниот снабдувач со електрична енергија – ЕВН Хоум.

Од партијата посочуваат дека во екот на зимата, кога температурите се под нулата, а граѓаните се соочуваат со зголемени потреби за греење и основни услови за живот, цели населени места во Куманово, Скопје, Тетово и Гостивар остануваат без електрична енергија. Според Алијансата, прекините одамна не се изолирани инциденти, туку траат со часови, па дури и со денови, сериозно нарушувајќи го секојдневието на граѓаните.

„Ова веќе не може да се оправдува како технички дефект, туку претставува систематски неуспех на компанија која има законска обврска да обезбеди континуирано и стабилно снабдување со електрична енергија“, се наведува во реакцијата на крилото на Села.

Оттаму нагласуваат дека последиците од ваквата состојба се сериозни и повеќекратни, потенцирајќи дека е неприфатливо граѓаните, и покрај инсталираните броила според стандардите на ЕВН Хоум, и понатаму да се соочуваат со чести прекини и нерешени дефекти.

Алијансата потсетува дека ЕВН има законска обврска да обезбеди непречено снабдување со електрична енергија, а секој продолжен прекин претставува директно прекршување на таа обврска.

„Во 2025 година, во срцето на Европа, недозволиво е граѓаните да остануваат без струја во најстудените денови од годината. Потребни се конкретни одговори и итни решенија, а не изговори“, порачуваат од таборот на Села.

Во меѓувреме, веќе петти ден по ред жителите на скопската населба Серава протестираат со блокирање на булеварот „Никола Карев“, познат како улицата „Пластичарска“. Тие велат дека се оставени без електрична енергија по големиот дефект што се случил во неделата и обвинуваат дека надлежните одбиваат да го санираат проблемот.

Од ЕВН Хоум, пак, информираат дека засега не може да се прецизира кога дефектот ќе биде отстранет. Според компанијата, жителите на улиците „Исмаил Кадаре“ и „Кумбара“ подолг период го попречуваат проектот за реконструкција на електродистрибутивната мрежа и преместување на мерните уреди.

„Нашите екипи се соочуваат со вербални закани, што целосно го оневозможува нивното работење и реализацијата на проектот“, велат од ЕВН Хоум.

Од компанијата додаваат дека без непречен пристап до теренот, невозможно е трајно санирање на дефектите, кои, како што тврдат, се резултат на пренатрупаност на мрежата поради голем број нелегални приклучоци. Според податоците на ЕВН, во овој регион загубите надминуваат 70 проценти, додека наплатата изнесува околу 60 проценти од вкупната потрошувачка на електрична енергија.