Апасиев: Мицкоски на денот на погребите во Кочани потпишал владин договор за мерење рејтинг

Претседателот на Левица и пратеник, Димитар Апасиев, жестоко реагираше по објавувањето на последната анкета на агенцијата „Маркет вижн“ за потребите на порталот „МКД.мк“. Апасиев тврди дека „договорот за мерење на рејтингот“ бил потпишан токму на денот кога во Кочани се одржуваа погребите на жртвите од неодамнешната трагедија.

„На денот на ПОГРЕБОТ во Кочани (кога ДПМНЕ ги обвинуваше сите за ‘некрофилија’) – Мицкоски ставил потпис на владин договор за маркетинг услуги и мерење рејтинг! Толку е постот“, напиша Апасиев на социјалните мрежи.

Во меѓувреме, од опозициската СДСМ викендов упатија обвинувања дека „омилената агенција на ВМРО-ДПМНЕ, која уште од времето на Никола Груевски работела на манипулирање на јавноста со лажни анкети, повторно е ангажирана, овој пат за сума од 400.000 евра од народни пари“.

„Зарем некој треба да верува во вакви анкети кои единствено служат за манипулирање на јавноста и се во функција на пропагандата на ДПМНЕ“, прашаа од партиското седиште на СДСМ, познато како „Бихаќка“.

Порталот „МКД.мк“ реагираше на овие обвинувања, потенцирајќи дека веќе седум години редовно објавуваат истражувања спроведени од агенцијата „Маркет вижн“ и дека досега сите нивни анкети реално ја отсликувале состојбата во македонското општество.

„Но, СДСМ секогаш посакуваат да ја гледаат реалноста низ розеви наочари. Така е и овој пат…“, наведуваат од „МКД.мк“.

Инаку, истражувањето било спроведено во периодот од 20 март до 17 април преку методот CATI (телефонско анкетирање со помош на компјутер), на репрезентативен примерок од 1.200 испитаници.