Без чисти чаршафи на Клинички центар „Мајка Тереза“
Болничките кревети на Клиничкиот центар „Мајка Тереза“ од денеска остануваат без чисти чаршафи, откако вработените во пералната започнаа со бојкот поради неисплатени плати. Вработените, кои од јануари 2024 година се под управа на приватната фирма „СкопСтер“, изјавија дека немаат примено плата уште од декември минатата година.
„Од декември немаме земено плата, чекаме секој ден. Денеска протестираме и не примаме чаршафи, само зелени зошто тоа треба за операции и не можеме така да оставиме“, изјавија вработени од пералната за Канал 5.
Оваа состојба дополнително го усложнува веќе нарушениот здравствен систем, кој се соочува со сериозни проблеми, вклучувајќи и хроничен недостиг на медицински кадар, особено на Клиниката за онкологија каде гужвите не стивнуваат.
Настанот доаѓа во чувствителен момент, додека јавноста чека назначување на нов министер за здравство, а проблемите во секторот се наталожени и нерешени.
Недостигот на основни хигиенски услови како што се чистите чаршафи го загрозува достоинството и здравјето на пациентите, а во исто време открива длабоки структурни проблеми во функционирањето на здравствениот систем. Ситуацијата предизвика сериозни реакции во јавноста, а одговорните институции засега немаат официјална реакција.
Очекувањата се насочени кон итна интервенција на надлежните, со цел решавање на кризата и враќање на основните услови за болничка нега.