Битиќи: Возачката дозвола поскапе за 30%, младите ја губат шансата за мобилност

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Битиќи: Возачката дозвола поскапе за 30%, младите ја губат шансата за мобилност

28 ноември 2025

• од Станча Јаќимовски

Пратеникот Фатмир Битиќи обвини дека актуелната Влада се обидува лажно да прикаже „розова“ економска слика, додека трошоците за живот постојано растат и го оптоваруваат семејниот буџет на граѓаните. На денешните пратенички прашања во Собрание на Република Северна Македонија, тој потенцираше дека последен удар е поскапувањето на возачката дозвола за Б категорија, чија цена е зголемена за околу 30%.

Според неговите наводи, обуката во авто-школите за Б категорија од 24.000 денари е зголемена на 33.000 денари, што значи над 10.000 денари поскапување. Покрај тоа, како што рече, младите и нивните семејства се соочуваат и со низа дополнителни задолжителни трошоци, меѓу кои 250 денари за секоја посета на полигон, 1.500 денари за користење возило при полагање, 1.200 денари за лекарско уверение и 2.500 денари за самото полагање.

Со сите давачки, Битиќи пресметува дека вкупниот износ за добивање возачка дозвола изнесува меѓу 40.000 и 42.000 денари – сума која, според него, е повисока од една и пол минимална плата во државата, каде нето минималната плата моментално е 24.379 денари.

„Стекнувањето на возачка дозвола од свечен чин на осамостојување на младите стана луксузна ставка. Младите ја губат шансата за мобилност, вработливост и пристап до пазарот на труд“, нагласи тој.

Прашања до министерот за транспорт и врски

Во своето обраќање, пратеникот упати директни прашања до министерот за транспорт и врски, Александар Николоски, дали ќе се преземат мерки за справување со ценовниот шок и дали смета дека е прифатливо возачката дозвола да чини повеќе од 1,5 минимални плати.

Тој, исто така, потенцира дека државата, наместо да вложува милиони во мебел, протокол и службени возила, треба да обезбеди „пристапна и праведна мобилност на младите“.

„Мобилноста е право, не привилегија“

Битиќи говореше под мотото дека мобилноста е социјално право и не смее да стане класна бариера резервирана за побогатите. Во таа насока, тој истакна дека како социјалдемократ се спротивставува на економска политика што создава нееднаквост и ограничени можности за младите луѓе.

Пратеникот оцени дека економската реалност е далеку од владиниот оптимизам и дека цените околу возачките дозволи директно влијаат врз шансите за работа, достоинствено движење и еднаков пристап до пазарот на трудот.

Актуелната власт, предводена од ВМРО-ДПМНЕ во коалиција со други партии, според него, мора да одговори со мерки за намалување на ценовниот притисок и заштита на социјалните права.