Денес ги славиме Светите маченици Акиндин, Пигасиј, Анемподист, Автониј, Елпидифор и другите со нив

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Денес ги славиме Светите маченици Акиндин, Пигасиј, Анемподист, Автониј, Елпидифор и другите со нив

15 ноември 2025

• од Станча Јаќимовски

Светите маченици Акиндин, Пигасиј, Анемподист, Автониј, Елпидифор и многу други со нив, беа христијани од древна Персија кои пострадаа во времето на царот Сапор (Савориј) во 355 година. Првите тројца – Акиндин, Пигасиј и Анемподист – служеа како царски слуги во дворецот, но тајно Му служеа на вистинскиот Владетел – Господ Исус Христос.

Кога беа откриени и изведени пред суд, царот ги праша од каде се. Мачениците без страв одговорија:
„Нашата татковина и нашиот живот е Пресвета Троица – Единосушна и Неразделна: Отецот, Синот и Светиот Дух, Единиот Бог.“

Разјарен од нивната смелост, царот ги предаде на разновидни и тешки маки. Но тие храбро ги поднесуваа страдањата, со молитва и псалмопение на своите усни. Божји ангели им се јавуваа повеќепати во затворот, а еднаш и Самиот Господ Исус Христос – во човечки лик, со лице што светело како сонце – ги укрепи за подвиго.

За време на едно мачење, кога врело олово беше излеано врз нив, но без никаква повреда, мачителот Автониј го виде чудото. Потресен од славата Божја, тој исповедаше:
„Голем е христијанскиот Бог!“
Поради ова смело сведоштво веднаш беше убиен со меч и со тоа и самиот се удостои со маченички венец.

Многумина други кои ги видоа чудата поверуваа во Христа. Тоа дополнително го разгневи Сапор, кој нареди Акиндин, Пигасиј и Анемподист да ги зашијат во кожни мевови и да ги фрлат во морето. Но таму им се јави светиот Автониј заедно со тројца ангели, ги изведе на суво и ги ослободи.

Елпидифор беше големец на царскиот двор. Кога јавно исповедаше дека е христијанин и го укори царот за неправедното убиство на невини христијани, беше осуден на смрт. Заедно со него пострадаа околу седум илјади верници.

На крајот, тројцата први маченици – Акиндин, Пигасиј и Анемподист – беа фрлени во огнена печка, заедно со дваесет и осум војници и со мајката на самиот цар, кои исто така поверуваа во Христа поради чудата што ги видоа. Во огнениот пламен, како во духовна светлина, тие ги предадоа своите праведни души во рацете на Господ.

Со својата вера, непоколеблива храброст и чудесни дела, овие свети маченици останаа вечни светилници и пример на ревност кон Бога.

Тропар на светите маченици

Страдалници Господови, блажена е земјата која се напои од вашата крв,
и свети се населбите кои ги примија телата ваши.
На боиштето непријателот го победивте,
и Христа со смелост Го проповедавте;
Него како Добар молете Го да се спасат нашите души, ве молиме.