Денеска се празнува Светиот Архангел Гавриил

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Денеска се празнува Светиот Архангел Гавриил

26 јули 2025

• од Станча Јаќимовски

На 26 јули според православниот календар, верниците го одбележуваат празникот посветен на Светиот Архангел Гавриил – еден од највозвишените ангели во небесната хиерархија, кој игра клучна улога во историјата на човечкото спасение.

Архангел Гавриил е благовесникот на воплотувањето на Синот Божји. Тој е еден од седумте големи ангели што претстојат пред престолот Божји и има исклучителна задача – да ги пренесува најсветите и најзначајни вести од Бога до луѓето. Неговата мисија не е борбена како онаа на архангел Михаил, туку мирна и спасоносна – да донесува радосна вест и надеж.

Во Светото Писмо, Архангел Гавриил му го соопштува на свети Захарија веста за раѓањето на свети Јован Крстител. Самиот архангел за себе вели: „Јас сум Гавриил, кој стојам пред Бога“ (Лука 1, 19), со што ја потврдува својата возвишена позиција и небесна мисија.

Неговото име, „Гавриил“, значи „Маж – Бог“, што укажува на природата на Оној што ќе се роди од Пречистата Дева – Господ Исус Христос, Мажот – Бог, силниот и крепкиот Спасител. Оваа симболика е толкувана од светите отци, кои укажуваат дека токму архангел со такво име требал да биде испратен да го соопшти најголемото чудо на човештвото – Благовештението.

Преданието вели дека истиот архангел им го објавил и на праведните Јоаким и Ана раѓањето на Пресвета Богородица. Исто така, се смета дека Гавриил го поучувал пророкот Мојсеј во пустината како да ја напише книгата Битие, првата книга на Стариот Завет.

Според преданијата и толкувањата на светите отци, Архангел Гавриил припаѓа на највисокиот небесен чин – серафимскиот. Тој е еден од седумте серафими што стојат најблиску до Бога. Имињата на овие седум ангели се: Михаил, Гавриил, Рафаил, Уриил, Селатиил, Јегудил и Варахиил. Некои им го додаваат и Јеремиил. Секој од овие ангели има своја посебна служба, но сите се рамночесни и служат за спасението на светот.

Одлуката токму Гавриил да биде испратен кај Дева Марија, а не Михаил, е длабоко симболична – Михаил ја има задачата да ги победи непријателите на верата, додека Гавриил носи вест за спасение, надеж и љубов.

Во чест на овој голем архангел, денес православните христијани се молат за сила, надеж и просветлување, барајќи од него да биде нивен застапник пред Бога, токму како што бил благовесник на добрата вест пред две илјади години.