ДКСК уверува: Постапките за утврдување индивидуална одговорност не ја поткопуваат институцијата

Државната комисија за спречување на корупцијата (ДКСК) ја уверува јавноста, партнерите и меѓународната заедница дека останува доследна на принципите на интегритет, транспарентност и владеење на правото, без оглед на актуелните случувања поврзани со осомниченоста на претседателката Татјана Димитровска.

Во своето соопштение, ДКСК истакнува дека продолжува да работи независно и ефикасно, во согласност со своите законски надлежности и мандат. Комисијата нагласува дека активностите за утврдување индивидуална одговорност не ја поткопуваат институционалната и колективната посветеност на превенцијата и борбата против корупцијата.

„Државната комисија продолжува да ги спроведува своите тековни активности и обврски. Нашата мисија за борба против корупцијата останува непроменета и посилна од кога било. Свесни сме за важноста на довербата на јавноста, затоа ќе продолжиме да работиме со највисока транспарентност и соработка со надлежните институции“, се наведува во реакцијата на Антикорупциската комисија.

Ова соопштение доаѓа откако јавноста беше информирана дека претседателката на ДКСК, Татјана Димитровска, е осомничена за оддавање службена тајна во случајот „Адитив“. Овој развој предизвика сериозни реакции, особено од поранешни членови на комисијата.

Поранешната претседателка на ДКСК, Билјана Ивановска, изјави дека ваквиот скандал е тежок удар за општеството и институцијата. Според неа, најитно е потребно Димитровска да поднесе оставка за да се зачува интегритетот на комисијата и довербата кај граѓаните.

„На потег е Собранието, кое треба да реагира. Членовите и претседателката на ДКСК одговараат пред Собранието. Треба да се преземат конкретни мерки и контроли. Претседателката мора најитно да си поднесе оставка затоа што на овој начин ја инфицира институцијата“, изјави Ивановска пред медиумите.

И од здруженијата беа упатени забелешки за отчетноста на ДКСК во последниот период, дополнително нагласувајќи ја потребата за итно расчистување на состојбата со цел зачувување на кредибилитетот на институцијата.