Државното здравство тоне во долгови – сумата оди кон 60 милиони евра

Долговите во јавното здравство во Македонија растат со забрзано темпо и веќе достигнуваат загрижувачки 60 милиони евра. Според последните извештаи, само во првиот квартал од годинава, јавните здравствени установи акумулирале нов долг од 5,4 милиони евра во споредба со претходниот квартал.

Најголем товар носи Службата за општи и заеднички работи во здравството, која со долг од околу 25 милиони евра останува на врвот на листата на најголеми должници во државата. Оваа служба, според податоците објавени од ТВ „24“, се вбројува и меѓу првите десет најголеми должници воопшто во државата.

Универзитетската клиника за онкологија успеала да го намали својот долг од десет на осум милиони евра, со што веќе не се наоѓа меѓу првите десет, но сè уште останува во топ 30 на должничката листа на Министерството за финансии. Од друга страна, Здравствениот дом-Скопје бележи пораст на долгот од 3,2 на 3,5 милиони евра, со што исто така се вклучува во оваа група на најзадолжени установи.

Јавното здравство, веднаш по јавните претпријатија и општините, се вбројува меѓу најзадолжените сектори во државата – што дополнително ја загрозува неговата финансиска стабилност и способност за нормално функционирање.

Од Фондот за здравствено осигурување уверуваат дека редовно спроведуваат надзори и контроли врз финансиското работење на јавните здравствени установи. Освен редовните проверки, се вршат и вонредни ревизии – било по барање на самите установи, било по проценка на менаџментот на Фондот. Овие наоди потоа се доставуваат до Министерството за здравство, Министерството за финансии и Државниот завод за ревизија, со цел навремено откривање на слабостите и барање решенија за финансиските проблеми кои стануваат се поголеми.