ДУИ со остра осуда за новите вработувања во Централниот регистар: „Албанците се целосно исклучени“

Демократската унија за интеграција (ДУИ) најостро го осуди решението на Централниот регистар, државна институција, за прием на осум нови вработени – без ниту еден Албанец меѓу нив. Според партијата, овој потег претставува сериозно прекршување на уставната обврска за правична и адекватна застапеност.

Во нивната реакција, од ДУИ истакнуваат дека ситуацијата е последица на укинувањето на Балансерот – механизам кој, според нив, бил суштински за обезбедување етничка еднаквост во јавната администрација. Наместо подобрување, ДУИ тврди дека состојбата намерно и системски се влошува.

„Овој развој е директна последица на укинувањето на Балансерот... Наместо еднаквост, гледаме институционализирана дискриминација“, стои во реакцијата.

ДУИ потсетува дека ваквите постапки се спротивни на Уставот и на Охридскиот рамковен договор и, како што велат, го поткопуваат демократскиот соживот и европските вредности кои државата тврди дека ги поддржува.

Партијата упати и остар повик до, како што ја нарекуваат, „моноетничката влада“ веднаш да го запре овој, според нив, опасен тренд и да ги врати механизмите на еднаквост и правда во институциите.

ДУИ не застана тука – остро се осврна и на останатите албански претставници во Владата, нарекувајќи ги „остатоци од ВЛЕН“, кои, според нив, немаат ниту влијание, ниту авторитет и со „срамна тишина“ ја легитимираат дискриминацијата.

„Секој што продолжува да ја легитимира оваа влада – било со учество, било со молк – е соучесник“, стои во соопштението.

ДУИ завршува со порака до албанската заедница: „Оваа влада има погрешен правец, и Албанците не треба да бидат неми жртви, туку активни носители на отпорот.“